ტელეკომპანია რუსთავი2-ის გენერალურმის დირექტორის, ნიკა გვარამიას თქმით, მას სახელმწიფო უსაფრთხოების სამსახურში უთხრეს, რომ უსმენდნენ. გვარამიას თქმით, "საინტერესო არაფერი აღმოჩნდა". ამის შესახებ გვარამიამ უწყების დატოვების შემდეგ განცხადა.

ტელეკომპანიის დირექტორი აღნიშნავს, რომ სუს-მა საპროცესო კანონმდებლობით გათვალისწინებული ვალდებულება შეასრულა და სწორედ ამიტომ აცნობეს მიყურადების შესახებ.

"გამოძიება მიმდინარეობს, რას დაადგენს და როგორ დაადგენს გამოძიება, ამაზე ვერაფერს ვერ გეტყვით. თუმცა, გამომდინარე იქიდან, რომ ამ საქმის მთავარი ფიგურანტი არის მესამე პრეზიდენტი, სააკაშვილი და ის საქმეები, რომელიც აქ მის წინააღმდეგ მიმდინარეობს, არის ეკონომიკური ხასიათის და მათ საფუძველზე უკრაინიდან მისი ექსტრადაცია არის შეუძლებელი, არ არის გამორიცხული, რომ მას წარუდგინონ ბრალი ისეთი ტიპის საქმისთვის ანუ მძიმე ბრალდებისთვის, რომელიც მისცემს უკრაინის ხელისუფლებას შესაძლებლობას, რომ სააკაშვილის ექსტრადიცია მოახდინოს", - განაცხადა გვარამიამ.

სუს-ში დაბარების შესახებ ნიკა გვარამიამ გუშინ, 25 აგვისტოს ფეისბუკში დაწერა. სახელმწიფო უსაფრთხოების სამსახურში განმარტეს, რომ ტელეკომპანია რუსთავი 2-ის დირექტორი კონტრდაზვერვის დეპარტამენტში სისხლის სამართლის საქმეზე ჩატარებული მოქმედებების ამსახველი მასალების გასაცნობად დაიბარეს. გვარამია ფეისბუკში წერდა, რომ ის 2015 წელს სახელმწიფო გადატრიალების საქმეში მასსა და საქართველოს ყოფილი პრეზიდენტის, მიხეილ სააკაშვილის სატელეფონო ჩანაწერის გამო დაიბარეს.