რატომ სცემეს [გვარამია], ისეთი დევგმირია, ათი ჩასკვნილი კაცი ვერ დააპატიმრებდა სხვანაირად?, — ამის შესახებ სოციალურ ქსელში ფსიქოლოგი ნათია ფანჯიკიძე წერს და კოალიცია ცვლილებების ლიდერის, ნიკა გვარამიას დაკავებას ეხმაურება.

მისი თქმით, ერთ-ერთი ყველაზე შემზარავი სანახაობა იყო გვარამიას დაპატიმრების სცენა, როცა "ნაცემ, უგონოდ მყოფ ადამიანს მიათრევდნენ და შალვა რამიშვილი აშუქებდა ამას და ბედნიერი დასცინოდა".

"ნიკა გვარამიას ვერც კი ვუსმენ, ვერ მიტანს და ბუნებრივია, არც მე ვგიჟდები მასზე, პირველად რომ დააპატიმრეს, არც გამოვქომაგებივარ, რადგან როგორც მოგახსენეთ, ტკბილი გრძნობები არ მაქვს მის მიმართ და არ მინდოდა, ყალბად დიდსულოვანი ტექსტები მეწერა მაშინ, მაგრამ თუ რამემ შემზარა და ჭკუიდან გადამიყვანა ამ სისხლიანი კვირის განმავლობაში, პირველი იყო კადრი, ძირს დაგდებული ბავშვის თავით რომ ფეხბურთს თამაშობდა აბჯარასხმული სადისტების ხროვა და ერთ-ერთი ყველაზე შემზარავი იყო გვარამიას დაპატიმრების სცენა, როცა ნაცემ, უგონოდ მყოფ ადამიანს მიათრევენ და შალვა რამიშვილი აშუქებს ამას და ბედნიერი დასცინის, ხორხოცებენ, როგორც მხიარულ გასართობზე, არადა ადამიანს თავი ისე აქვს ჩამოგდებული, რომ იმ კადრის მიხედვით, იმ მომენტში, ისიც არ ვიცით, რა სერიოზულობის ტრავმაა, იქნებ ცოცხალიც კი არაა.

სამთავრობო არხი კი გვამეცადინებს ცოცხალ-მკვდარი ადამიანის ხილვით სიხარულში!

საერთოდ რატომ სცემეს, ისეთი დევგმირია, ათი ჩასკვნილი კაცი ვერ დააპატიმრებდა სხვანაირად? უსამშობლობა სწორედ ერთმანეთის ასეთი ხარისხის სიძულვილს ნიშნავს. სამშობლო უპირველესად ადამიანებია, თორემ ბუნება ამ პლანეტაზე ყველგან ლამაზია. არ გვევალება ყველას სიყვარული, მაგრამ გვეკრძალება სიძულვილი. ახლაც მეტირება, ეს სცენა რომ მიდგება თვალწინ", — წერს ნათია ფანჯიკიძე სოციალურ ქსელში.