დღეს აშშ-ს 6-მა სენატორმა ერთობლივი განცხადება გაავრცელა, სადაც წერია, რომ ისინი პრეზიდენტ სალომე ზურაბიშვილს ესაუბრნენ და გამოხატეს შეშფოთება მშვიდობიანი საპროტესტო გამოსვლების ძალადობრივი დაშლის გამო რაც, ქვეყნის ევროკავშირთან გაწევრიანების მოლაპარაკებების შეჩერებასთან დაკავშირებით, ქართული ოცნების გადაწყვეტილების მოჰყვა.

განცხადებაში, რომელსაც სენატის საგარეო ურთიერთობათა კომიტეტის თავმჯდომარე ბენ კარდინი და სენატორები — ჯინ შაჰინი, ჯიმ რიში, კრის კუნსი, ლინდსი გრემი და დიკ დურბინი ავრცელებენ, ვკითხულობთ, რომ საქართველოს მოსახლეობას აშშ-ს სენატის ძლიერი, ორპარტიული მხარდაჭერა აქვს.

"ჩვენ ვესაუბრეთ საქართველოს პრეზიდენტს, სალომე ზურაბიშვილს, რათა გამოგვეხატა ორპარტიული მხარდაჭერა მისი ხელმძღვანელობის მიმართ და სერიოზული შეშფოთება მშვიდობიანი საპროტესტო გამოსვლების ძალადობრივი და სასტიკი ჩახშობის გამო, რაც "ქართული ოცნების" გადაწყვეტილებას მოჰყვა ქვეყნის ევროკავშირში გაწევრიანების მოლაპარაკებების შეჩერებას შესახებ.

დღეების განმავლობაში, საქართველოს ხალხმა გამოიყენა მშვიდობიანი პროტესტის უფლება არაკონსტიტუციური გადაწყვეტილების შემდეგ, რომელიც უგულებელყოფს ქართველთა აბსოლუტური უმრავლესობის მისწრაფებებს, რომელთაც სურთ ევროკავშირში გაწევრიანება. საქართველოს მოსახლეობას აქვს ძლიერი, ორპარტიული და ორპალატიანი მხარდაჭერა. ეს უნდა შეახსენოს ქართულ ოცნებას, რომ აშშ-ის პოლიტიკა უცვლელი დარჩება უახლოეს თვეებში", — ნათქვამია გავრცელებულ განცხადებაში.

სენატორები ასევე წერენ, რომ მიესალმებიან ბაიდენის ადმინისტრაციის ბოლო განცხადებას იმის შესახებ, რომ გამოიყენოს მიზანმიმართული სანქციები იმ პირებზე, რომლებიც პასუხისმგებელნი არიან ხალხის წინააღმდეგ ძალადობაზე.

"ჩვენ მივესალმებით ბაიდენის ადმინისტრაციის ბოლო განცხადებას მისი განზრახვის შესახებ, გამოიყენოს მიზანმიმართული სანქციები იმ პირებზე, რომლებიც პასუხისმგებელნი არიან ძირს უთხრის საქართველოს ინსტიტუტებსა და ხალხის წინააღმდეგ ძალადობას და ვიმედოვნებთ, რომ გადაიდგმება ნაბიჯები ამ პროცესის დასაჩქარებლად. მომავალი დღეები კრიტიკული იქნება საქართველოს მომავლისთვის და შეერთებულმა შტატებმა უნდა გააგრძელოს თავისი 32-წლიანი ტრადიცია მყიფე, მაგრამ ძნელად მებრძოლი დემოკრატიის მხარდასაჭერად", — ნათქვამია სენატორების წერილში.