აქტივისტის დოდი ხარხელის სახლი სამართალდამცველებმა დატოვეს. ის დღეს დილით მაშინ დააკავეს, როცა მცირეწლოვანი შვილი საბავშვო ბაღში მიიყვანა, მოგვიანებით კი საკუთარ სახლში მიიყვანეს, სადაც შსს-მ ჩხრეკა ჩაატარა.

აქტივისტი ამბობს, რომ რეჟიმი ცდილობს, დააშინოს ყველა, ვინც ხმას იღებს.

"ეს ყველაფერი ეხება იმ არაკანონიერ გადაწყვეტილებებს, რასაც იღებს ეს ქვეყანა, დე ფაქტო ხელისუფლება და ყველანაირად ცდილობს შეინარჩუნოს თავისი სტატუსი და ყველანაირად ცდილობს, რომ დააშინოს ყველა, ვინც საერთოდ რამეზე ხმას იღებს. აზრი არ აქვს რა ეწერება ნებისმიერი რამის ოქმში, სადაც არ უნდა იყოს, მიზეზი ყველაფრის არის ერთი — ქუჩაში რომ გვაჩერებს პოლიციელი გზის გადაკვეთაზე, მაგის მიზეზიც დღესდღეობით არის ერთადერთი — ეს მიზეზი არის რუსეთი", — ამბობს დოდი ხარხელი.

აქტივისტი დაკავების მომენტს იხსენებს და ამბობს, დაკავებისას მას LIVE-ს ჩართვა სურდა, თუმცა, ტელეფონი წაართვეს და "ხელებიც ძალადობრივად გადამიგრიხეს".

"ბავშვი დავტოვე ბაღში, 3 წლის შვილი და გამოსვლისთანავე დამადგა რამდენიმე მამაკაცი და როდესაც მივხვდი, რომ რაღაც ხდებოდა, გადავწყვიტე ტელეფონით ლაივი ჩამერთო, თუმცა ამის საშუალება არ მომცეს, წამართვეს, სამწუხაროდ და ხელებიც ძალადობრივად გადამიგრიხეს, ამის შემდეგ დავიწყე ხმაური, სიგნალის მიცემა მანქანაზე და გამვლელებისთვის თხოვნა, რომ ლაივი ჩაერთოთ, საბედნიეროდ ჩართეს ლაივი და ბაღმაც ირეაგირა, რომ თქვენამდე მოსულიყო ეს ინფორმაცია.

ამის შემდეგ, ყველაფერი მოხდა ძალიან ზრდილობიანად, სინამდვილეში, იქაც, რომ მოვედით, უშუალოდ ჩხრეკის პროცესიც და ამის ერთადერთი მიზეზი, რომ ახლა არ მაქვს დაზიანებები, არის ის რომ ეს ყველაფერი მოხდა საჯაროდ და არის ბევრი კამერის წინ და ეს არის ერთადერთი დაცვა, რაც თითოეულ მოქალაქეს გვაქვს, ეს არის — მაქსიმალური საჯაროობა", — ამბობს დოდი ხარხელი.

მისი თქმით, ჩხრეკის შემდეგ წაიღეს ფლეშკები, ტელეფონები, ლეპტოპები და სხვა ნივთები.

"რაც შეეხება რა წაიღეს — ყველაფერი, დავიწყებული ფლეშკა, მობილურები, ძველი მობილურები, მათ შორის სამუშაო ლეპტოპები, ჩემი, ჩემი მეუღლისაც, ბავშვისაც. ჩვენ ძალიან ციფრული ოჯახი ვართ, Smarthome ელემენტებით და ა.შ. შესაბამისად, ძალიან დიდხანს გაგრძელდა ჩხრეკა, რადგან უმრავი AppleTV და რაღაც ნივთები გვქონდა და გვაქვს.

თავიდან არ განმიმარტეს რა იყო დაკავების მიზეზი, როცა მანქანაში ჩამსვეს და მომეწერა ხელი ოქმზე, რომელზეც არ მომიწერია, რაც ძალიან საინტერესოა და შემდეგ უკვე იურისტთან ერთად ვისაუბრებთ ამაზე არის ის, რომ გადაუდებელ და სასწრაფო ჩხრეკად კვალიფიცირდა. როდესაც ეს გამოძიება მიმდინარეობს უკვე რამდენიმე თვეა და მეტიც, მე ვიყავი კიდევაც უკვე მოწმედ დაბარებული და მიცემულიც მაქვს ჩვენება მაგისტრ მოსამართლესთან. მიუხედავად ამისა, თვეების მერე გახდა საჭირო, რომ საბავშვო ბაღიდან გამოსული დავეკავებინე უამრავ მამაკაცს", — ამბობს დოდი ხარხელი.

გავრცელებული ინფორმაციით, დოდი ხარხელის სახლთან ჩატარებული საგამოძიებო მოქმედებები მისი ყოფილი მეუღლის, უჩა აბაშიძის საქმის ფარგლებში მიმდინარე გამოძიებას უკავშირდება.