თეთრი ხმაურის მოძრაობის აქტივისტი ქეთა გაბუნია ფეისბუკზე ლევან ბერიანიძის ფოტოს აქვეყნებს, რომელზეც ჩანს მისი დაზიანებები.

25 აგვისტოს, გამთენიისას, ბათუმის ბულვარში პოლიციამ თანასწორობის მოძრაობის აღმასრულებელი დირექტორი ლევან ბერიანიძე და ორგანიზაციის წევრი თორნიკე კუსიანი დააკავა.

ლევან ბერიანიძე ბათუმის სასამართლოში.

ფოტო: ქეთა გაბუნია / Facebook

როგორც დაკავებულების ადვოკატმა სალომე ღოღობერიძემ On.ge-ს განუცხადა, დაკავებულების სასამართლო ცოტა ხანში დაიწყება.

დაკავებულების სხეულზე ფიზიკური ძალადობის კვალზე შსს აცხადებდა, რომ "დაუდგენელი პირები და დაკავებულები ერთმანეთს ფიზიკურ და სიტყვიერ შეურაცხყოფას აყენებდნენ", თუმცა ადგილზე მისულ სამართალდამცველებს ბერიანიძე და კუსიანი არ დაემორჩილნენ და პოლიციამ ისინი დააკავა.

დაკავებულები დღეს ადვოკატმა სალომე ღოღობერიძემ და სახალხო დამცველის წარმომადგენელმა ციალა ქათამიძემ ინახულეს. ორივე მათგანი On.ge-სთან საუბრისას დაკავებულების სხეულზე ძალადობის კვალს ადასტურებს.

როგორც დაკავებულებმა ადვოკატს უთხრეს, ისინი ბულვარში ჯერ სამოქალაქო ტანსაცმელში ჩაცმულმა პირებმა სცემეს და შემდეგ პოლიციამ გადაიყვანა ისინი განყოფილებაში, სადაც ასევე სცემეს და მიაყენეს სიტყვიერი და ფიზიკური შეურაცხყოფა.

ციალა ქათამიძე ჩვენთან საუბრისას ასევე ადასტურებდა, რომ დაკავებულებს ერთი შეხედვით დათვალიერებისას აღენიშნებოდათ გარკვეული ტიპის დაზიანებები:

"სახეზე დაზიანებები, ასევე სისხლჩაქცევები, ჩალურჯებები და ნაკაწრები აქვთ და ვცდილობთ დავადგინოთ, ჰქონდა თუ არა ადგილი პოლიციის მხრიდან პროცესუალურ დარღვევას. გასარკვევია დაზიანებების მიღების დრო და ვითარება".

ამ თემაზე: