თეიმურაზ ჯანჯალიას თანამდებობა არ დაუტოვებია და ეს იყო საკადრო გადაწყვეტილება რომელიც მიიღო მაკა ბოჭორიშვილმა — ირაკლი კობახიძე ბრიფინგზე საგარეო საქმეთა მინისტრის მოადგილის გადადგომას გამოეხმაურა.

"რაც შეეხება თეიმურაზ ჯანჯალიას, აქ ცოტა განსხვავებულადაა ვითარება. საუბარი მანამდე იყო შემდგარი მაკა ბოჭორიშვილსა და თეიმურაზ ჯანჯალიას შორის და გადაწყვეტილება იყო უკვე მიღებული იმასთან დაკავშირებით, რომ იგეგმებოდა ცვლილება. ანუ ამ შემთხვევაში თეიმურაზ ჯანჯალიას თანამდებობა არ დაუტოვებია და ეს იყო საკადრო გადაწყვეტილება, რომელიც მიიღო მაკა ბოჭორიშვილმა. დაზუსტებისთვის, მაკა ბოჭორიშვილმა შესთავაზა სისტემაში დარჩენა. რა იქნება მისი გადაწყვეტილება არ ვიცი, მაგრამ ეს არის ის ფაქტები, რაზეც შემიძლია ვისაუბრო", — განაცხადა კობახიძე.

შეგახსენებთ, გუშინ გავრცელდა ინფორმაცია, რომ საგარეო საქმეთა მინისტრის მოადგილემ, თეიმურაზ ჯანჯალიამ თანამდებობა დატოვა.