აზერბაიჯანული საინფორმაციო სააგენტო Turan-ის ხელმძღვანელი მეჰმან ალიევი დააკავეს. მას გადასახადების გადახდისგან თავის არიდებასა და თანამდებობის ბოროტად გამოყენებაში სდებენ ბრალს.

როგორც ადგილობრივი მედია იუწყება, ალიევს სახაზინო ადვოკატის მომსახურება შესთავაზეს, მაგრამ მან უარი განაცხადა და თქვა, რომ მას ჰყავს დამცველი.

სააგენტო Turan-მა გაავრცელა განცხადება იმასთან დაკავშირებით, რომ მეჰმან ალიევის დაკავების გამო სააგენტოს საბანკო ანგარიშები დაბლოკილია და ისინი იძულებულნი ხდებიან, პირველი სექტემბრიდან შეწყვიტონ მუშაობა:

"მსგავს სიტუაციაში სააგენტოს ნორმალური ფუნქციონირება საკმაოდ რთული ხდება. სიტუაციიდან გამომდინარე, Turan-ის კოლექტივი იძულებულია პირველი სექტემბრიდან გაურკვეველი ვადით მუშაობა შეწყვიტოს. უახლოეს პერიოდში, ჩვენი ვებგვერდის მუშაობას საკუთარი რესურსებისა და ენთუზიაზმის ხარჯზე უზრუნველყოფთ. საინფორმაციო გამოშვებები შეზღუდული რაოდენობით იქნება".

ჟურნალისტების საერთაშორისო კომიტეტმა (CPJ) Turan-ს აზერბაიჯანში ერთადერთი დამოუკიდებელი მედიასაშუალება უწოდა და ხელისუფლებას მისი თანამშრომლების დევნის შეწყვეტისკენ მოუწოდა. Human Rights Watch-მაც მოუწოდა აზერბაიჯანის მთავრობას, სააგენტოს მუშაობაში ჩარევა შეწყვიტოს.

საინფორმაციო სააგენტო Turan აზერბაიჯანში 1990 წლიდან ფუნქციონირებს. ორგანიზაცია რეპორტიორი საზღვრების გარეშეს მიერ შედგენილი რეიტინგით, მედიათავისუფლების მხრივ, აზერბაიჯანი 162-ე ადგილს იკავებს.