საქართველოს პრემიერ-მინისტრის გიორგი კვირიკაშვილის განცხადებით, პერიოდული სიტუაციების გაუარესების მიუხედავად არის დადებითი დინამიკა, დღეს კი სახანძრო-სამაშველო სამუშაოებში საჯარისო ნაწილი ჩაერთო:

"აღმოსავლეთ სარდლობის 1000-ზე მეტი კაცი შემოგვიერთდა. მათთან ერთად, ვინც აქამდე მუშაობდა ყველა ჩვეულებრივად აგრძელებს მუშაობას. უკვე ერთობლივი ძალებით დღეს დავამუშავებთ ცეცხლის ყველა ზონას და ვფიქრობთ, რომ დღის ბოლოს გვექნება გაცილებით უკეთესი დინამიკა".

პრემიერის თქმით, დღის ბოლოს, შესაძლებელია, ცეცხლის საბოლოო ჩაქრობის ეტაპზე გადავიდნენ, პარალელურად კი ერთობლივი შტაბი მუშაობს განაგრძობს. კვირიკაშვილის განმარტებით, გუშინ საღამოს ერთ-ერთ ზონაში გართულებული მდგომარეობა იყო:

"მოსახლეობას საფრთხეს ვაშორებთ. წუხელ საღამოს ერთ-ერთ ზონაში საკმაოდ გართულებული მდგომარეობა იყო, მაგრამ ჩვენ შევძელით საფრთხის აცილება. პრევენცია გაკეთებულია ყველა ზონაში, საფრთხე არავის ემუქრება... არდაგანში იყო წუხელ ცოტა გართულებული სიტუაცია, მაგრამ ავიაციისა და ცოცხალი ძალის მეშვეობით, შესაძლებელია ამ ზონის განეიტრალებაც, ისე რომ არ გართულდეს".

ბორჯომის ხეობაში ცეცხლი 20 აგვისტოს გაჩნდა. მას შემდეგ მაშველები მის ლოკალიზებას ცდილობენ, მაგრამ ძლიერი ქარის გამო ხანძრის ჩაქრობა ჯერ კიდევ ვერ მოხერხდა. სახანძრო-სამაშველო ოპერაციაში ჩაერთო აზერბაიჯანული და თურქული ტექნიკა, ასევე ხანძრის ლოკალიზებაში მონაწილეობა სომხეთმა და ბელორუსიამ მიიღეს.