პარლამენტის შიდა ეზოში და მიმდებარე ქუჩებზე პოლიციის ეკიპაჟებია განლაგებული, — პოლიციამ თითქმის მთლიანად გაასუფთავა პარლამენტის მიმდებარე ქუჩები სამოქალაქო მანქანებისგან.

შეგახსენებთ, დღეს 21:00 საათიდან რესპუბლიკის მოედანზე ოპოზიციის აქცია იმართება. აქციის მონაწილეები ცოტა ხანში რესპუბლიკის მოედნიდან დაიძვრებიან და პარლამენტის შენობასთან მივლენ, ისინი აქ მთელი ღამის გათენებას გეგმავენ.

ცნობისთვის, დღეს შინაგან საქმეთა სამინისტრომ განცხადება გაავრცელა და აქციის ორგანიზატორები და მოქალაქეები გააფრთხილა:

"კანონით პირდაპირ აკრძალულია სტრატეგიული ან განსაკუთრებული მნიშვნელობის ობიექტის ბლოკირება, რომელიც საქართველოს სისხლის სამართლის კოდექსის 222-ე მუხლის თანახმად დასჯად ქმედებას წარმოადგენს.

ამ დანაშაულის ჩამდენი პირის მიმართ სისხლის სამართლის კოდექსი სასჯელის სახით ითვალისწინებს, თავისუფლების აღკვეთას ვადით ორ წლამდე, ხოლო თუ ქმედება ჯგუფურადაა ჩადენილი - ჯგუფის წევრების მიმართ თავისუფლების აღკვეთას 4 წლამდე ვადით.

ამასთან, საზოგადოებას შევახსენებთ, რომ 2024 წლის 23 ოქტომბრის საქართველოს მთავრობის №361 დადგენილებით დადგინდა სტრატეგიული ან/და განსაკუთრებული მნიშვნელობის ობიექტების ნუსხა, რომელთა შორის არის საქართველოს პარლამენტისა და მთავრობის ადმინისტრაციის შენობები.

შესაბამისად, დაგეგმილი აქციის მონაწილეებსა და ორგანიზატორებს ვაფრთხილებთ, რომ არ გასცდნენ შეკრება/მანიფესტაციის კანონით დადგენილ ფარგლებს და თავი შეიკავონ კანონსაწინააღმდეგო ქმედებისგან.

წინააღმდეგ შემთხვევაში, პოლიცია მიიღებს ყველა შესაბამის სამართლებრივ ზომას უკანონო ქმედების აღსაკვეთად", — აღნიშნულია განცხადებაში.