საქართველოს საუნივერსიტეტო საზოგადოება განცხადებას ავრცელებს, სადაც ნათქვამია, რომ ისინი მკაცრად გმობენ, 19 ნოემბერს, თბილისის სახელმწიფო საუნივერსიტეტო სივრცის ბოროტად გამოყენებას, მშვიდობიანი აქციის ძალის გადამეტებით დაშლას და თავისუფლების პრინციპების უხეშ უგულებელყოფას.


"უნივერსიტეტმა, რომლის კარი ყოველთვის ღია უნდა იყოს სტუდენტებისა და პროფესორებისთვის, დღეს მისი პრინციპული მისიის საპირისპიროდ იმოქმედა — კარები ჩაუკეტა მათ და ძალოვანი სტრუქტურები შეუშვა მშვიდობიანი აქციის მონაწილეთა, მათ შორის ამავე უნივერსიტეტის სტუდენტების დასარბევად",— ნათქვამია განცხადებაში.

საუნივერსიტეტო საზოგადოება მიიჩნევს, რომ ეს ქმედება შეურაცხყოფს უნივერსიტეტს, როგორც თავისუფლებისა და პროგრესის სიმბოლოს და არღვევს აკადემიურ დამოუკიდებლობას.

"ეს ქმედება შეურაცხყოფს უნივერსიტეტს, როგორც თავისუფლებისა და პროგრესის სიმბოლოს, არღვევს აკადემიურ დამოუკიდებლობას და ეწინააღმდეგება მის ისტორიულ მისიას.
საგანმანათლებლო სივრცეები, განსაკუთრებით კი ივანე ჯავახიშვილის სახელობის თბილისის სახელმწიფო უნივერსიტეტი, როგორც პირველი ეროვნული უნივერსიტეტი, უნდა იყოს ადგილი, სადაც დაცული იქნება თითოეული ადამიანის ფუნდამენტური უფლებები, გამოხატვის თავისუფლება, განურჩევლად პირადი მრწამსისა თუ შეხედულებებისა. ეს პრინციპი, რომელიც ყველა საგანმანათლებლო დაწესებულების არსებობის ფუნდამენტია, დღეს უხეშად დაირღვა.
ვაცხადებთ, რომ ნებისმიერი ადმინისტრაცია, რომელიც უგულებელყოფს სტუდენტების უფლებებსა და გამოხატვის თავისუფლებას, მიიღებს აკადემიური საზოგადოების მკაცრ პროტესტს. იმავდროულად მიგვაჩნია, რომ აღნიშნულ ქმედებაზე პასუხისმგებლობა ეკისრება უნივერსიტეტის აკადემიურ საბჭოსა და რექტორს, რომელიც ამ დრომდე დუმს და განცხადებაც არ გაუკეთებია", — აღნიშნულია განცხადებაში.

გავრცელებულ განცხადებას ხელს საქართველოს უმაღლესი საგანმანათლებლო დაწესებულებების 312 ლექტორი აწერს. მათ შორის არის პროფესორ-მასწავლებლები თსუ-დან, ილიაუნიდან, სულხან-საბა ორბელიანის უნივერსიტეტიდან, თბილისის სახელმწიფო სამედიცინო უნივერსიტეტიდან, კავკასიის უნივერსიტეტიდან, ბათუმის შოთა რუსთაველის
სახელმწიფო უნივერსიტეტიდან, საქართველოს უნივერსიტეტიდან, კავკასიის უნივერსიტეტიდან, თავისუფალი უნივერსიტეტიდან, GIPA-დან, გრიგოლ რობაქიძის უნივერსიტეტიდან, ქართულ-ამერიკული უნივერსიტეტიდან, აღმოსავლეთ ევროპის უნივერსიტეტიდან, შავი ზღვის საერთაშორისო უნივერსიტეტიდან, ბიზნესისა და ტექნოლოგიების უნივერსიტეტიდან, ალტე უნივერსიტეტიდან და ა.შ.