საქართველოს პრემიერ-მინისტრის გიორგი კვირიკაშვილის განცხადებით, სომხეთიდან დამხმარე ეკიპაჟები ჩამოდიან.

"სომხეთმა მიიღო გადაწყვეტილება და მთელი რიგი ეკიპაჟები მზად არიან და ჩამოდიან".

ბორჯომის ხეობაში ხანძრის ლოკალიზების სამუშაოებში, ასევე, აზერბაიჯანისა და თურქეთის დამხმარე ეკიპაჟები იღებენ მონაწილეობას. პრემიერი განმარტებით, დღის ბოლოს თურქეთიდან დიდი მოცულობის სახანძრო ვერტმფრენი ჩამოფრინდება:

"ჩვენ ძალიან მნიშვნელოვანი დახმარება მივიღეთ. პირველი დახმარება მივიღეთ აზერბაიჯანისგან და ეს არის ორი ვერტმფრენი და, ასევე, სახანძრო მანქანები, რომლებიც ახლა გზაშია და ვერტმფრენი მთელი დღეა მუშაობს. მივიღეთ მნიშვნელოვანი დახმარება თურქეთისგან. ორი ვერტმფრენი უკვე ბათუმშია და ჩაერთვება სახანძრო ოპერაციაში. დღის ბოლოს ჩამოფრინდება დიდი მოცულობითი სახანძრო თვითმფრინავი, მიუხედავად იმისა, რომ მათ თვითონ აქვთ დღეს ეს პრობლემა".

ბორჯომის ხეობაში უკვე მესამე დღეა მთის ფერდობები იწვის. გუშინ ცეცხლი ლოკალიზებული იყო, თუმცა ძლიერმა ქარმა ახლიდან გააღვივა.

საგანგებო შტაბის განცხადებით, ბორჯომის ხეობაში, ტყის მასივში ხანძრის ლოკალიზების პროცესში, ამ დროისთვის, 3 ვერტმფრენი, 400-მდე მეხანძრე-მაშველი, 100-ზე მეტი ტყის მცველი, შსს-ს განსაკუთრებულ დავალებათა დეპარტამენტის 500 თანამშრომელი და ათეულობით მძიმე ტექნიკაა ჩართული, რომელთა მობილიზებაც საქართველოს სხვადასხვა რეგიონიდან განხორციელდა.

გაიჭრა 3 კილომეტრიანი გზა არჯევანის ტყიდან ხანძრის მიმართულებით თროთის მთამდე, რამაც შესაძლებელი გახადა ხანძრის მთავარ კერამდე სახანძრო-სამაშველო ტექნიკის შეუფერხებელი გადაადგილება.