ბორჯომის ხეობაში უკვე მესამე დღეა მთის ფერდობები იწვის. შინაგან საქმეთა სამინისტროს ინფორმაციით, მობილიზებულია მძიმე ტექნიკა და ცოცხალი ძალა, რომელსაც ხანძრის კერამდე მისასვლელი გზა გაჰყავს. შეუჩერებლად მუშაობენ სახანძრო-სამაშველო ბრიგადები. ადგილზე იმყოფება 270 მაშველი.

როგორც შინაგან საქმეთა სამინისტრო აცხადებს, ქართულ ავიაციასთან ერთად, რამდენიმე საათში, ხანძრის ლიკვიდაციის სამუშაოებში ჩაერთვება აზერბაიჯანული და თურქული მხარეც, რომლებიც დამატებით ვერტმფრენებს გამოგზავნიან. ამ დროისათვის არ არსებობს ხანძრის დასახლებულ პუნქტებზე გადასვლის საფრთხე.

მთავრობის ხელმძღვანელის მეთაურობით შექმნილია საგანგებო შტაბი, რომელიც კონტროლს უწევს სტიქიასთან ბრძოლის პროცესს. საგანგებო შტაბი ეხმაურება სხვადასხვა პირების მიერ სოციალური ქსელებით და თუ სხვა საშუალებებით გავრცელებულ ინფორმაციას, მოხალისეების მობილიზების შესახებ. როგორც შტაბი აცხადებს, ამ დროისათვის არ არსებობს მოხალისეების ჩართვის არანაირი აუცილებლობა. უფრო მეტიც, ნებისმიერი გარეშე პირის, ხანძრის მიმდებარე პერიმეტრზე გამოჩენა ხელს შეუშლის მეხანძრეების, მაშველების და შესაბამისი უწყებების მიერ მობილიზებული ცოცხალის ძალისა თუ ტექნიკის მუშაობას. საგანგებო აღჭურვილობის გარეშე ხანძრის კერებთან მიახლოება არის საშიში.

საგანგებო შტაბი მიმართავს ყველა მოქალაქეს, თავი შეიკავოს თვითნებური გადაწყვეტილებებისაგან და ნუ შეუქმნიან დამატებით პრობლემას მეხანძრეებსა და მაშველებს, რომლებიც სტიქიას ებრძვიან.