ბსუ-ს სტუდენტებს მხარდაჭერას უცხებენ ილიაუნის, თსსუ-ს და ჯიპას სტუდენტები და არჩევნების გაყალბებასთან დაკავშირებით პროტესტს უერთდებიან.

თსსუ-ს განცხადებაში ნათქვამია, რომ მხარს უჭერენ ბსუ-ს სტუდენტების ბრძოლას მოპარული ხმისთვის და გმობენ თითოეული პირის მონაწილეობას არჩევნების გაყალბების პროცესში.

“თსსუ-ს სტუდენტური მოძრაობა ვეხმიანებით ბათუმის სახელმწიფო უნივერსიტეტის სტუდენტების პროტესტს, მხარს ვუჭერთ მათ ბრძოლას მოპარული ხმისთვის და ვგმობთ თითოეული პირის მონაწილეობას არჩევნების გაყალბების პროცესში.

შევახსენებთ ბსუ-ს იურიდიული ფაკულტეტის დეკანს, რომ ჩვენი, სტუდენტების, არათუ უფლება, მოვალეობაა სამშობლოს სამსახურში დგომა, რომ ვერავინ შეძლებს ჩვენი ხმის ჩახშობას ვერც უნივერსიტეტებში და ვერც უნივერსიტეტებს მიღმა!

დღეს ჩვენც ჩვენი ხმების, სამშობლოს, თავისუფლებისა და ევროპული მომავლის გუშაგები ვართ! მოგიწოდებთ ერთიანობისკენ!

ჩვენ, სტუდენტები, როგორც საქართველოს აქტიური მოქალაქეები და დამკვირვებლები, რომლებიც თავადვე შევესწარით, როგორ ყალბდებოდა საქართველოს არჩევანი, მონაწილეობას მივიღებთ ყველა მშვიდობიან აქციასა და მსვლელობაში, რათა დავიბრუნოთ ჩვენი ხმა და ევროპული მომავალი!

ვიბრძვით თავისუფლებისთვის!

გავიმარჯვებთ სახელოვნად!," — ნათქვამია თსსუ-ს სტუდენტური მოძრაობის მიერ გავრცელებულ განცხადებაში.

ბსუ-ს მხარდამწერ პოსტს აქვეყნებს ჯიპას სტუდენტური მოძრაობაც, სადაც ვკითხულობთ, რომ აკადემიური სფერო იქნება ცოცხალი და დამოუკიდებელი, რისთვისაც საჭიროა, რომ ქართველმა ხალხმა დავიბრუნოთ ჩვენი არჩევანი.

"ჯიპას სტუდენტური მოძრაობის სახელით სოლიდარობას ვუცხადებთ ბათუმის შოთა რუსთაველის სახელმწიფო უნივერსიტეტის სტუდენტებს, რომლებიც აპროტესტებენ გაყალბებულ არჩევნებს და გაყალბების პროცესში მმართველი პარტიის მხრიდან აკადემიური სფეროს გამოყენებას.

ვწუხვართ, რომ სტუდენტებს — დემოკრატიულ, სამართლიან და თანასწორ მომავალს იმ ადამიანების ხელებით გვართმევენ, რომლებსაც პროფესიული ღირსება ავალდებულებთ მოიქცნენ ივანე ჯავახიშვილის მსგავსად, რომელიც მუდამ ქართული სახელმწიფოს და უნივერსიტეტის საუკეთესო ინტერესების მცველი იყო.

აკადემიური სფერო იქნება ცოცხალი და დამოუკიდებელი, რისთვისაც საჭიროა, რომ ქართველმა ხალხმა დავიბრუნოთ ჩვენი არჩევანი. ამ ბრძოლაში თითოეული სტუდენტის ხმა მნიშვნელოვანია. ვიმედოვნებთ, რომ ბათუმელი სტუდენტების გამბედავი და სამართლიანი პროტესტი განაახლებს ახალგაზრდების შემართებას და საერთო ძალისხმევით საქართველო დაუბრუნდება თავის ისტორიულ — ევროპულ გზას", — ნათქვამია ჯიპა-ს სტუდენტური მოძრაობის მიერ გავრცელებულ განცხადებაში.

დღეს ბათუმის სახელმწიფო უნივერსიტეტის სტუდენტების პროტესტს არჩევნების გაყალბებასთან დაკავშირებით უნივერსიტეტის ადმინისტრაციის უკმაყოფილება მოჰყვა. პროტესტისადმი მოწოდებამ უნივერსიტეტის იურიდიული ფაკულტეტის დეკანი ლევან ჯაყელი გააღიზიანა და სტუდენტებს ჩივილით დაემუქრა.

ბსუ-ში სტუდენტების პროტესტი სტუდენტების პროტესტი მოძრაობა მარტიანელების და მოძრაობა პერსპექტივის ორგანიზებით დაიწყო.