ოკუპირებულ აფხაზეთში ოპოზიციამ კოდორის ხიდი კვლავ ჩაკეტა, — ინფორმაციას რუსული მედია ავრცელებს.

გავრცელებული ინფორმაციით, ოპოზიციამ სოხუმიდან გამომავალი სამივე ხიდი დაბლოკა.

ოკუპირებულ აფხაზეთში საპროტესტო ტალღა ოპოზიციის რამდენიმე წარმომადგენლის დაკავებას მოჰყვა, რომლებიც რუსეთთან საინვესტიციო შეთანხმების რატიფიკაციას ეწინააღმდეგებიან. მომიტინგეებმა სოხუმის სამივე ხიდი გადაკეტეს. საუბარია ქვემო და ზემო გუმისთასა და კოდორის ხიდებზე. დღეს დილით ე.წ. ადგილობრივი ხელისუფლების წარმომადგენლები აქციის მონაწილეებს დაკავებულების საათნახევარში გათავისუფლებას დაჰპირდნენ და ამ დაპირების სანაცვლოდ ხიდი დროებით განიბლოკა, თუმცა ისინი ამ დრომდე არ გაუთავისუფლებიათ.

კოდორის ხიდზე ამ წუთებში ოპოზიციონერებიც და სამართალდამცავებიც არიან შეკრებილი.

11 ნოემბერს, გვიან ღამით ოკუპირებულ აფხაზეთში 5 ოპოზიციონერი დეპუტატი დააკავეს. დაკავების სავარაუდო მიზეზი ის გახდა, რომ ისინი რუსულ-აფხაზური "საინვესტიციო ხელშეკრულების" რატიფიცირებას ეწინააღმდეგებიან.

დაკავების შემდეგ, ე.წ. სახელმწიფო უსაფრთხოების სამსახურის შენობასთან ხალხი შეიკრიბა, რომლებიც დაკავებულთა გათავისუფლებას მოითხოვდნენ.

აქციის მონაწილეებმა გადაკეტეს გუმისთის და კოდორის ხიდები.

ბოლო ინფორმაციით, გადაკეტილ კოდორის ხიდთან ე.წ. დეპუტატი ბესლან ემურხბა და ოჩამჩირის ე.წ. რაიონის გამგებელი ბესლან ბიგვავა მივიდნენ და აქციის მონაწილეებს გზის გახსნა მოსთხოვეს, სანაცვლოდ შეკრებილებს დაკავებულების გათავისუფლებას დაჰპირდნენ, რის შემდეგაც პროტესტანტებმა ხიდზე ბარიკადი მოხსნეს. ამ დროისთვის, კოდორის ხიდი გახსნილია.