12 ნოემბრის ღამით ტელეგრამ-არხებზე გავრცელდა ინფორმაცია იმის შესახებ, რომ ოკუპირებული აფხაზეთის ე.წ. პრეზიდენტი ასლან ბჟანია ვა-ბანკზე წავიდა და ოპოზიციონერების დაპატიმრება დაიწყო.

ვინ დააკავეს ოკუპირებულ აფხაზეთში?

დადასტურებული ინფორმაციით, დაკავებულია 5 ოპოზიციონერი: ომარ სმირი, გარი კოკაია, ალმასხან არძინბა, რამაზ ჯოპუა და ასლან გვარამია. ისინი გუდაუთიდან, საზოგადოებრივი შეკრებიდან ბრუნდებოდნენ, როცა დააკავეს და ე.წ. სახელმწიფო უსაფრთხოების სამსახურში გადაიყვანეს. ოპოზიციონერების დაკავებიდან საათზე ნაკლებ დროში, ადგილზე ასობით ადამიანი მივიდა. შეკრებილებსა და ძალოვნებს შორის დრო და დრო მდგომარეობა იძაბებოდა და შეხლა-შემოხლა იყო.

მოსახლეობამ, უკანონოდ დაკავებულების დაუყოვნებლივ გათავისუფლების მოთხოვნით, სოხუმისკენ მიმავალი გზები და გუმისთის და კოდორის ხიდები გადაკეტა.

რა გახდა 5 ოპოზიციონერი დეპუტატის დაკავების მიზეზი?

როგორც დაკავებული ოპოზიციონერების მხარდამჭერები აცხადებენ, დაკავებების მიზეზი ის გახდა, რომ ოპოზიციონერები რუსულ-აფხაზური "საინვესტიციო ხელშეკრულების" რატიფიცირებას ეწინააღმდეგებიან, რომლის რატიფიცირებასაც ოკუპირებული აფხაზეთის დე ფაქტო პარლამენტი 15 ნოემბერს გეგმავს.

ე.წ. შეთანხმება ითვალისწინებს, რომ ინვესტორი რვა წლით თავისუფლდება საბაჟო გადასახადისგან, ასევე კორპორაციული ქონების გადასახადისა და საშემოსავლო გადასახადისგან. დამატებითი ღირებულების გადასახადი კი ინვესტორისთვის მხოლოდ 5% იქნება. ოკუპირებულ აფხაზეთში აზრი ორად არის გაყოფილი. ნაწილი მიიჩნევს, რომ პროექტის საზიანო იქნება ოკუპირებული აფხაზეთის ეკონომიკისთვის და საფრთხეს შეუქმნის მის უსაფრთხოებას.

12 ნოემბერს, შუაღამის შემდეგ, ტელეგრამ-არხით გავრცელდა აფხაზეთის ე.წ. გენერალური პროკურორის, ადგურ აგრბას ვიდეომიმართვა. მისი თქმით, დაკავებულებმა 10 ნოემბერს, ე.წ. პარლამენტის სხდომაზე "მრავალფუნქციური კომპლექსების სამართლებრივი სტატუსის მოწესრიგების" კანონპროექტის განხილვის შემდეგ, ე.წ. პარლამენტის ეზოში ერთ-ერთი დეპუტატის მიმართ მართლსაწინააღმდეგო ქმედებები ჩაიდინეს, რასაც თან ახლდა უცენზურო ლანძღვა.

ოკუპირებულ ტერიტორიაზე მოქმედი ოპოზიციური "სახალხო მოძრაობის" ლიდერის, ადგურ არძინბას განცხადებით, ასლან ბჟანიამ ოპოზიციონერებს ექსტრემისტები უწოდა და ამ დაკავებებით ხალხის დაშინებას ცდილობს.

"თქვენ ყველა მოწმე ხართ, როგორ დააკავეს ჩვენი თანამებრძოლები დღეს. ეს არის ორი ყოფილი პარლამენტის წევრი, იურისტი, პრეზიდენტის ადმინისტრაციის ყოფილი თანამშრომელი, სპორტსმენი და პატრიოტი.

ასლან ბჟანიამ, სამწუხაროდ, შსს-ში სიტყვით გამოსვლისას შემდეგი ფრაზა წარმოთქვა - მან ყველას — ჩვენი ქვეყნის უზარმაზარ ნაწილს — ექსტრემისტები უწოდა. შევარდნაძე ჩვენს მამებს ომის დროს სეპარატისტებს უწოდებდა, დღეს ჩვენს მიწაზე ექსტრემისტები გავხდით.

რის საფუძველზე აკავებენ პოლიტიკურ მოღვაწეებს? უფრო მეტიც, დაკავების სტილი ისე ხდებოდა, თითქოს განსაკუთრებით საშიში დამნაშავეები იყვნენ დაკავებულები. სახელმწიფო უსაფრთხოების სამსახურში სასაუბროდ რომ მიეწვიათ, თვითონ მოვიდოდნენ.

ეს იმაზე მეტყველებს, რომ ლეგიტიმაციის სრული არარსებობის გაცნობიერებით, ასლან ბჟანიამ გადაწყვიტა ვიღაცის შეშინება ასეთი ვითომ დამაშინებელი მეთოდებით, მაგრამ ამას ყოველთვის საპირისპირო ეფექტი ჰქონდა აფხაზეთში", — განაცხადა ადგურ არძინბამ.

12 ნოემბერს გვიან ღამით, ასლან ბჟანიამ "უშიშროების საბჭოს" საგანგებო სხდომა მოიწვია, სადაც "უშიშროების ძალების" ხელმძღვანელებმა "უკანონო ქმედებების თავიდან აცილების მიზნით გატარებულ ღონისძიებებზე ისაუბრეს".

ბოლო ინფორმაცია

ბოლო ინფორმაციით, გადაკეტილ კოდორის ხიდთან მივიდნენ დეპუტატი ბესლან ემურხბა და ოჩამჩირის რაიონის გამგებელი ბესლან ბიგვავა და აქციის მონაწილეებს გზის გახსნა მოსთხოვეს, სანაცვლოდ შეკრებილებს დაკავებულების გათავისუფლებას დაჰპირდნენ, რის შემდეგაც პროტესტანტებმა ხიდზე ბარიკადი მოხსნეს. ამ დროისთვის, კოდორის ხიდი გახსნილია.