ვალენსიის მერიის წინ პროტესტის მონაწილეებსა და სპეცრაზმს შორის შეტაკება მოხდა. ვითარება ქალაქის მერიასთან მას შემდეგ გამწვავდა, როდესაც დემონსტრაციის მონაწილეთა ნაწილმა სამართალდამცველებს სკამები და სხვადასხვა ნივთი ესროლა. ინფორმაციას ამის შესახებ ალ ჯაზირა ავრცელებს.

გამოცემის მიხედვით, ამ დროის მონაცემებით ვალენსიაში 80 ადამიანი კვლავ დაკარგულად ითვლება, გამანადგურებელი წყალდიდობის შედეგებში ხალხი ხელისუფლებას ადანაშაულებს., რის გამოც ქალაქის ცენტრალურ ნაწილში ათობით ათასი ადამიანი შეიკრიბა.

ესპანეთში, რეგიონულ მთავრობებს ეკისრებათ სამოქალაქო დაცვის პასუხისმგებლობა და შეუძლიათ მოითხოვონ დამატებითი რესურსები მადრიდის ეროვნული მთავრობისგან, პროტესტის მონაწილეები ამჟამინდელ რეგიონულ ლიდერს კარლოს მაზონის გადადგომას მოითხოვენ და ამბობენ, რომ მისმა ადმინისტრაციამ ვერც მოქალაქეების დროული გაფრთხილება შეძლო და ვერც ოფიციალური მადრიდის ინფორმირება მოახერხა თავის დროზე.

მაზონის ადმინისტრაცია ამტკიცებს, რომ კრიზისის მასშტაბები არაპროგნოზირებადი იყო. განმარტების მიუხედავად, დემონსტრანტები მიიჩნევენ, რომ მსხვერპლის მასშტაბი სტიქიურ უბედურებაზე ხელისუფლების ნელმა და არაორგანიზებულმა რეაგირებამ განაპირობა.

აღმოსავლეთ ესპანეთში ძლიერი წვიმით გამოწვეულ წყალდიდობას, სულ მცირე, 220 ადამიანი ემსხვერპლა.