ტრამპის გუნდი უკრაინის ნატოში გაწევრიანების მინიმუმ 20 წლით გადადებას განიხილავს, — ამის შესახებ სტატიას სათაურით WSJ აქვეყნებს: "ტრამპმა პირობა დადო, რომ დაასრულებს ომს უკრაინაში, ახლა მან უნდა გადაწყვიტოს როგორ?"

WSJ წერს, რომ უკრაინაში ომის შეჩერების ის გეგმა, რომელიც ტრამპთან დაახლოებულმა პირებმა გააჟღერეს უკრაინის ნატოში გაწევრიანებაზე 20-წლიან მორატორიუმს და ცეცხლის შეწყვეტის ხაზის დღევანდელი ფრონტის ხაზის გასწვრივ დადგენას გულისხმობს. ერთ-ერთი მოსაზრების მიხედვით, თუ კიევი ნატოს მინიმუმ 20 წლის განმავლობაში არ შეუერთდება, აშშ რუსეთის მომავალი თავდასხმის შესაჩერებლად უკრაინის იარაღით მომარაგებას განაგრძობს.

გამოცემის ინფორმაციით, ტრამპს მოუწევს არჩევანის გაკეთება თავისი მრჩევლების მიერ შეთავაზებულ წინადადებებზე — მაიკ პომპეო კონფლიქტის ისეთ მოგვარებას შესთავაზებს, რაც მოსკოვისთვის სასიამოვნო არ იქნება და მეორე მრჩეველმა, რიჩარდ გრენელიმ შეიძლება უპირატესობა მიანიჭოს ტრამპის სურვილს რაც შეიძლება მალე დაასრულოს ომი, თუნდაც ეს ნიშნავდეს კიევის იძულებას, რომ მნიშვნელოვან დათმობებზე წავიდეს.

"ამ გეგმის მიხედვით, ფრონტის ხაზი არსებითად ჩაკეტილი იქნებოდა და ორივე მხარე დათანხმდებოდა 800 მილის დემილიტარიზებულ ზონას. ვინ გააკონტროლებს ამ ტერიტორიას, გაურკვეველი რჩება, მაგრამ ერთ-ერთმა მრჩეველმა თქვა, რომ სამშვიდობო ძალები არ ჩაერთვება ამერიკულ ჯარებში და არც შეერთებული შტატების მიერ დაფინანსებული საერთაშორისო ორგანოდან, როგორიცაა გაერო", — წერს WSJ.

გამოცემაში ნათქვამია, რომ თავისი კამპანიის განმავლობაში, ტრამპი აკრიტიკებდა ბაიდენს და აფრთხილებდა, რომ მისი ქმედება მესამე მსოფლიო ომს რეალურს ხდიდა. ტრამპა თქვა, რომ მას შეუძლია კონფლიქტის სწრაფად მოგვარება და ორივე მხარის მოლაპარაკების მაგიდასთან მიყვანა, მაგრამ არ გაუმხელია, როგორ აპირებს ამას.

სინამდვილეში, გამოცემის განმარტებით, ტრამპმა არ დაამტკიცა კონკრეტული სამშვიდობო გეგმა, მათ შორის — როგორ დაარწმუნებდა ის რუსეთის პრეზიდენტ ვლადიმერ პუტინს და უკრაინის პრეზიდენტ ვოლოდიმირ ზელენსკის, რომ დამსხდარიყვნენ ერთ მაგიდასთან და მოლაპარაკება დაეწყოთ.