7 და 8 ნოემბერს, ევროპელი ლიდერები, ევროპული საბჭოს არაფორმალურ შეხვედრაზე, საქართველოში არჩევნების შემდეგ არსებულ ვითარებას განიხილავენ, ამის შესახებ ევროპული საბჭოს პრეზიდენტის, შარლ მიშელის წერილში ვკითხულობთ.

"ჩვენ არჩევნების შემდეგ საქართველოში არსებულ ვითარებას და წინსვლის გზას განვიხილავთ", — ნათქვამია შარლ მიშელის წერილში.

ევროპული საბჭოს ლიდერები ევროატლანტიკური ურთიერთობებისა და გაერო-ს მხარდაჭერის შესახებ ისაუბრებენ.

"აშშ-სთან ჩვენი ურთიერთობა ძალიან მნიშვნელოვანია და მზად ვართ იგი გავაღრმაოთ. სტრატეგიული დღის წესრიგის შესაბამისად ჩვენი პრიორიტეტების განხორციელება უნდა გავაგრძელოთ, ძლიერი და სუვერენული ევროპის მშენებლობისკენ აქტიურად ვიმუშაოთ", — ამბობს მიშელი.

ამასთან, დღეს ბუდაპეშტში გაიმართება ევროპის პოლიტიკური გაერთიანების სამიტი, რომელშიც მონაწილეობას 47 სახელმწიფო მიიღებს, მათ შორის იქნება საქართველოც.

ევროპის პოლიტიკური გაერთიანების სამიტზე ლიდერები ევროპის უსაფრთხოების გამოწვევის, უკრაინის წინააღმდეგ რუსეთის აგრესიული ომის, არალეგალური მიგრაციის, აღმოსავლეთში მიმდინარე ესკალაციისა და გლობალური ვაჭრობის საკითხის შესახებ იმსჯელებენ.