ცენტრალური საარჩევნო კომისია ადასტურებს, რომ რუს პროპაგანდისტ ალექსანდრ მალკევიჩს არჩევნებზე მუშაობის უფლება ჰქონდა, რადგან საარჩევნო აკრედიტაცია მასზე ცესკომ თავად გასცა. ამის შესახებ ინფორმაციას ტვ პირველი ავრცელებს.

მედიასაშუალების ინფორმაციით, ცესკო ამბობს, რომ საერთაშორისო მედიის წარმომადგენლებს ონლაინ არეგისტრირებს და მხოლოდ საარჩევნო კანონთან მიმართებაში განიხილავს მათი აკრედიტაციის საკითხს.

ტვ პირველი აცხადებს, რომ ცესკოს არ განუმარტავს, როგორ მისცეს რუს პროპაგანდისტს, სანქცირებულ პირს უფლება, რომ საქართველოში აკრედიტაცია მიეღო. ტელეკომპანიის ინფორმაციით, შინაგან საქმეთა სამინისტროს აქვს კითხვაზე პასუხი — როგორ გადმოკვეთა სახელმწიფო საზღვარი რუსმა პროპაგანდისტმა, რომელსაც დარღვეული აქვს ოკუპაციის შესახებ კანონი და ამავე დროს ამერიკის შეერთებული შტატების და კანადის მიერ სანქცირებულია.

ინფორმაციას რუსი პროპაგანდისტის საქართველოში ყოფნის შესახებ რამდენიმე დღის წინ საერთაშორისო ორგანიზაცია რეპორტიორები საზღვრებს გარეშე ავრცელებდა.

რადიო თავისუფლების ინფორმაციით, საერთაშორისო ორგანიზაციამ საქართველოში საპარლამენტო არჩევნების დროს კრემლის რუპორის, ტელეარხ სანქტ-პეტერბურგის დირექტორის, ალექსანდრ მალკევიჩის თბილისში ყოფნას "შემაშფოთებელი" უწოდა.

გამოცემის ინფორმაციით, საქართველოში ყოფნას მოწმობს მალკევიჩის მიერ ტელეგრამის არხით გავრცელებული ვიდეომასალა და მის მიერ რუსული მედიისთვის მიცემული ინტერვიუებიც. ჩანს, რომ მალკევიჩი თბილისში უკვე 23 ოქტომბერს იმყოფებოდა — მას ფოტოები აქვს გადაღებული მმართველი პარტიის, ქართული ოცნების საარჩევნო კამპანიის დასკვნით ღონისძიებაზე თბილისში. ტელეგრამის პირად გვერდზე კი ფოტოებს აქვეყნებს გორში სტალინის მუზეუმისა და მცხეთაში სვეტიცხოვლის ფონზე.

მალკევიჩი ტელეგრამის არხ ლომოვკას მოუყვა, რომ საქართველოში რამდენიმე დღე გაატარა. ინტერვიუში ის საქართველოს პრეზიდენტ სალომე ზურაბიშვილს "ვადაგასულ პრეზიდენტს" და "უცხოეთის აგენტს" უწოდებს, რომლის შესახებაც "ქართველ კოლეგებს თვალი აუხილა".

არჩევნების შედეგების შეფასებისას კი ამბობს, რომ "უცნაური ხალხი გამოდის და ამბობს, რომ არჩევები არალეგიტიმური იყო, რაიმე მტკიცებულების წარდგენა კი არ შეუძლიათ" .

ალექსანდრ მალკევიჩი 2023 წელს ოკუპირებულ ცხინვალშიც იმყოფებოდა, სადაც დე ფაქტო პრეზიდენტს, ალან გაგლოევს შეხვდა. ინფორმაცია ამის შესახებ ე.წ. პრეზიდენტის ვებგვერდზეც იძებნება.