უახლოეს მომავალში ხელი მოეწერება სტრატეგიული პარტნიორობის განახლებულ ხელშეკრულებას რუსეთსა და ირანს შორის, რომელშიც მნიშვნელოვანი ყურადღება დაეთმობა თავდაცვის საკითხებს, – ამის შესახებ რუსეთის საგარეო საქმეთა მინისტრმა, სერგეი ლავროვმა მინსკში, ევრაზიული უსაფრთხოების საერთაშორისო კონფერენციაზე სიტყვით გამოსვლისას განაცხადა. ინფორმაციას რუსული მედია ავრცელებს.

ლავროვის თქმით, აღნიშნული შეთანხმება ორ ქვეყანას შორის თანამშრომლობას კიდევ უფრო გააღრმავებს.

"რუსეთ-ირანული ურთიერთობების განმტკიცების სერიოზული ფაქტორი რუსეთსა და ირანს შორის ყოვლისმომცველი სტრატეგიული პარტნიორობის შესახებ შეთანხმება იქნება. ის ხელმოწერისთვის უახლოეს პერიოდში იქნება მზად. იქ დადასტურდება მხარეთა სურვილი თავდაცვის სფეროში მჭიდრო თანამშრომლობისა და მშვიდობისა და უსაფრთხოების ინტერესებში ურთიერთქმედების შესახებ რეგიონულ და გლობალურ დონეზე", — განაცხადა ლავროვმა.