მოძრაობა თავისუფლების მოედნის ხელმძღვანელის, სიმონ ჯანაშიას განცხადებით, მოძრაობა თავისუფლების მოედანი წინააღმდეგობის მოძრაობას იწყებს, რითაც 2024 წლის საპარლამენტო არჩევნების გაყალბებული შედეგების გამოძიებას შეეცდებიან.

სიმონ ჯანაშიას თქმით, შემდგომ ნაბიჯებთან დაკავშირებით 1-ელ ნოემბერს, 19:00 საათზე მზიურის პარკში შეიკრიბებიან.

"სიმბოლურია, რომ აქედან ვიწყებთ მოძრაობას იმიტომ, რომ 46 წლის წინ, როდესაც ახალგაზრდები აქედან რუსთაველზე წავიდნენ, მათ შევარდნაძემ მიმართა, "რას შვრებით, ბავშვებო?", რაზეც მათ უპასუხეს: "ჩვენ, შენი ბავშვები არ ვართ!". ჩვენ არ ვართ ის ბავშვები, რომლებსაც სჭირდებათ ცეკა-ს მდივნები, რომ უკარნახონ, როგორ უნდა იცხოვრონ. ჩვენ ვართ თავისუფალი მოქალაქეები და ჩვენ ამიტომ ვიწყებთ წინააღმდეგობის მოძრაობას, რომელიც იქნება საყოველთაო, მშვიდობიანი, დემოკრატიული და რა თქმა უნდა, კანონიერი. ამ მოძრაობის ადგილი იქნება ყველგან – ვიმოქმედებთ ქუჩებშიც, აუდიტორიებშიც, პარკებშიც და არა მხოლოდ თბილისში, არამედ საქართველოს ყველა რაიონში, ქალაქში და სოფელში. ჩვენ შევეცდებით გამოვიძიოთ გაყალბება, რაც მოხდა. ჩვენ იდენტიფიცირებას გავუწევთ იმ ადამიანებს, ვინც მონაწილეობდა ამ გაყალბებაში. ჩვენ შევზღუდავთ ხელისუფლების წევრებს და მათ მოქმედებებს. საჯარო სივრცეებში ჩავატარებთ ახალი ტიპის აქციებს, ეს არ იქნება მხოლოდ მასობრივი აქციები და რუსთაველზე აქციები, არამედ იქნება აქციები, რომელიც დაანახებს ადამიანებს, თუ რა მოხდა საქართველოში და რატომ არის მნიშვნელოვანი ამაზე მათი რეაგირება", — განაცხადა სიმონ ჯანაშიამ.