ეკა ბესელიამ ტვ პირველის ეთერში თქვა, რომ ვიდრე პრეზიდენტი საპრეზიდენტო უფლებამოსილებას ასრულებს, ის ხელშეუხებელია. მისი თქმით ეს "ყველაზე მაღალი იერარქიის კანონით" — კონსტიტუციით არის განსაზღვრული.

ამასთან, დასძინა რომ პრეზიდენტის ძალით წაყვანას მაგისტრ მოსამართლესთან ან პროკურატურაში ვერავინ შეძლებს.

"არანაირი ინტერპრეტაცია არ შეიძლება, როდესაც საუბარია მაგისტრ მოსამართლესთან თუ რომელიმე მოსამართლესთან პრეზიდენტი არ მიდის , ან არ მიდის პროკურატურაში, ვინმეს აქვს უფლება ის იძულებით (წაიყვანოს). იძულებით წარდგენა თავისუფლების შეზღუდვის ერთ-ერთი თემაა, ამის უფლება არავის არ აქვს", — განაცხადა ბესელიამ.

მისივე თქმით, პრეზიდენტის პროკურატურაში დაბარება პოლიტიკური პროცესია:

"ამას (პროკურატურის განცხადებას) წინ უძღვის მედვედევის ცნობილი მოთხოვნა, ქართული ხელისუფლების მიმართ, რომ პრეზიდენტი გადააყენეთ და დააკავეთო. ამ განცხადების შემდეგ სალომე ზურაბიშვილის გამოკითხვაზე მიწვევა გამოძიების იმიტაციაა, სინამდვილეში კი პოლიტიკური შურისძიების, საზოგადოებაზე ზემოქმედების შინაარსს შეიცავს", — დასძინა ბესელიამ.

საქართველოს პრეზიდენტმა, სალომე ზურაბიშვილმა პროკურატურაში მისვლაზე უარი განაცხადა და მათ ურჩია, რომ პოლიტიკურ დაკვეთას თავი დაანებონ და საქმე აკეთონ.

შეგახსენებთ, რომ ცესკოს მიმართვის საფუძველზე, საქართველოს პროკურატურამ საპარლამენტო არჩევნების სავარაუდო გაყალბებების ფაქტზე გამოძიება გუშინ, 30 ოქტომბერს დაიწყო.

გამოძიების საფუძველზე, დაიბარეს საქართველოს პრეზიდენტი, რომლის გამოკითხვა საგამოძიებო უწყებაში 31 ოქტომბერს იყო ჩანიშნული.