საქართველოს ცენტრალურმა კომისიამ საარჩევნო ადმინისტრაციის თანამშრომლებზე ზეწოლის ფაქტებზე საინფორმაციო ბრიფინგი ჩაატარა და განცხადება გაავრცელა. უწყების ცნობით, 26 ოქტომბრის არჩევნების შემდეგ ინტენსიური ხასიათი აქვს საარჩევნო ადმინისტრაციის თანამშრომლებზე ზეწოლას. კომისია აფრთხილებს ყველას, რომ მათი მისამართით ნებისმიერი განხორციელებული ზარი თუ შეტყობინება, რომელიც კანონთან წინააღმდეგობაში იქნება, გადაიგზავნება შესაბამის ორგანოებში შემდგომი რეაგირებისთვის.

"ზეწოლის ქვეშ არიან ყველა დონის საარჩევნო კომისიების, მათ შორის საზღვარგარეთის საარჩევნო უბნის წევრები. ზოგიერთი მათგანის პირად ტელეფონებზე შედის შეურაცხმყოფელი ზარები და მუქარის შემცველი შეტყობინებები. შეურაცხყოფას, ზეწოლას, ბულინგს და სიძულვილის ენის გამოყენებას ინტენსიური ხასიათი აქვს სოციალურ ქსელშიც. ზეწოლა ხორციელდება როგორც ინდივიდუალურად კონკრეტულ პერსონებზე, ისე უწყების ოფიციალურ გვერდებზე სოციალურ ქსელში. თქვენ ახლა ეკრანზე ხედავთ ჩემი სიტყვების დამადასტურებელ სქრინებს, რომელიც ძალიან მცირე ნაწილია შეურაცხმყოფელი შეტყობინების და კომენტარების", — მოვისმინეთ ბრიფინგზე.