თბილისის მერიის განცხადებით, ჭავჭავაძის გამზირზე ხეების მოჭრის ნებართვა გაიცა, ვინაიდან კომპანია ეკონომიკის სამინისტროს წინაშე ნაკისრ ვალდებულებას ვერ ახორციელებდა.

უწყების ცნობით, საკადასტრო ტერიტორიაზე არსებული 90 ფოთლოვანი და წიწვოვანი ხიდან, ნებართვა გაიცა რვა ხის მოჭრაზე და ექვსი ხის გადარგვაზე:

"ეკოლოგიისა და გამწვანების სამსახურმა მიიღო შპს მესხი-ს განცხადება, რომელიც საკუთარ ტერიტორიაზე - ჭავჭავაძის გამზირზე #82-ში ორი წლის განმავლობაში ვერ ახორციელებდა საქართველოს ეკონომიკის სამინისტროს წინაშე ნაკისრ საინვესტიციო ვალდებულებას - ტერიტორიაზე სავალი გზის მოწყობას, რისთვისაც ითხოვდა ხეების მოჭრის ნებართვას".

მერიის განცხადებით, კომპანია იღებს ვალდებულებას, მოჭრილი ხეების სანაცვლოდ, დარგოს ხეები და მოაწყოს მწვანე სივრცე.

დღეს, 17 აგვისტოს ბაგებში დაგეგმილი მშენებლობის გამო 10-მდე საღი ხე მოიჭრა. ალეკო ელისაშვილის მონაცემებით, კი უკვე მოჭრილია ცხრა ჯანსაღი ხე, ხოლო ნებართვა გაცემულია 15 ხის მოჭრაზე. პარტიზანული მებაღეობის იურისტი ვახტანგ სახოკია მერიაში განცხადების შესატანად მივიდა, რომელიც ხეების ჭრაზე გამოცხადებული მორატორიუმის დარღვევას უკავშირდებოდა. ამასთან, სახოკია მერიაში მანამ არ შეუშვეს, სანამ იურისტმა პატრული არ გამოიძახა.