საქართველოს პრემიერმინისტრმა, ირაკლი კობახიძემ, საერთაშორისო კრიტიკის მიუხედავად განაცხადა, რომ არჩევნებმა მშვიდ გარემოში ჩაიარა და ირწმუნება, რომ რამდენიმე უბანზე მიზანმიმართულ პროვოკაციებს ჰქონდა ადგილი, თუმცა სამართალდამცველებმა ამ ინციდენტების აღკვეთა მოახერხეს. ამის შესახებ მან მთავრობის სხდომაზე განაცხადა.

უპრეცედენტოდ მშვიდ გარემოში ჩატარდა არჩევნები ჩვენს ქვეყანაში. იყო რამდენიმე უბანი, სადაც იყო კოორდინირებული პროვოკაციები, თუმცა საბოლოო ჯამში, აქაც იმოქმედა შსს-მ და საბოლოო ჯამში და საბოლოოდ მოხერხდა არსებითად მშვიდ გარემოში არჩევნების ჩატარება, — განაცხადა პრემიერმინისტრმა.

ცნობისთვის, საერთაშორისო სადამკვირვებლო მისიებმა 26 ოქტომბრის არჩევნების პროცესზე თქვეს, რომ უპრეცედენტო დარღვევების ფონზე მიმდინარეობდა და ამ საკითხზე შეშფოთება გამოხატეს.

ამასთან, საქართველოს პრეზიდენტმა, სალომე ზურაბიშვილმა და ოპოზიციურმა პარტიებმა არჩევნების შედეგები არ აღიარეს.