Atlantic Council-ის თანამშრომლის, ფედერალისტების პარტიის წევრის, გიორგი ნონიაშვილი და სოფო გელავას სახლში ჩხრეკა დასრულდა. ფინანსურმა პოლიციამ წაიღო სოფო გელავას პერსონალური კომპიუტერი, პირადი ტელეფონი, გიორგი ნონიაშვილის ლეპტოპი და მათი არასრულწლოვანი შვილის ლეპტოპი.

სოფო გელავას თქმით, ჩხრეკა დაკავშირებულია Atlantic Council-თან, კომპანიასთან, რომელსაც ის დაკონტრაქტებული ჰყავს.

"ამიხსნეს, რომ ეს არის დაკავშირებული იმ კომპანიასთან, რომელსაც დაკონტრაქტებული ვყავარ, თუმცა, რეალურად მე ვმუშაობ ატლანტიკურ საბჭოში, ეს არის საერთაშორისო ორგანიზაცია, ამერიკაში დაფუძნებული და ჩემი საქმიანობა არის პირდაპირ დაკავშირებული დეზინფორმაციასთან, საინფორმაციო ოპერაციების კვლევასთან, რუსეთის ჩარევასთან. ამიტომ, ჩემთვის, ამ წუთას ძალიან საეჭვოა, რა ხდება და რასთან არის დაკავშირებული ეს ამბავი. უბრალოდ მითხრეს, რომ ამ კომპანიასთან არის დაკავშირებული ფინანსური გამოძიება, რეალურად, ეს არის HR კომპანია, რომელიც არის დაკონტრაქტებული ატლანტიკური საბჭოს მიერ", — აცხადებს სოფო გელავა TV პირველთან.

გიორგი ნონიაშვილის განცხადებით, ის პოლიტიკურ საქმიანობას ეწევა და მისი პირადი კომპიუტერული ტექნიკის ამოღება გაუმართლებელია, რადგან არანაირ კავშირში არ არის მისი ცოლის სამსახურებრივ საქმიანობასთან.

„არ ვარ ხოლმე მომხრე შეთქმულების თეორიების, მაგრამ ჩემი ყველა კუთვნილნი დივაისი წაიღო საგამოძიებო სამსახურმა იმ პირობებში, როცა პოლიტიკურ საქმიანობას ვეწევი და იმ პირობებში, როცა ჩემს მიერ კუთვნილი დივაისები იყო. თუნდაც ფორმალურად რომ წავიკითხოთ საგამოძიებო პროცესი, არანაირ კავშირში არ იყო, თუნდაც, ჩემი ცოლის სამსახურებრივ საქმიანობასთან კონტრაქტორ კომპანიებთან“, — განაცხადა გიორგი ნონიაშვილმა ტვ პირველთან.

შეგახსენებთ, რომ დღეს ფინანსთა სამინისტროს საგამოძიებო სამსახური ჩხრეკა ჩაატარა ასევე Atlantic Council-ის კიდევ ერთი თანამშრომლის, ეთო ბუზიაშვილის და იუმორისტი ძმების სანდრო და ონისძე ცხადაძეების სახლებში.