რუსული მედიის ცნობით, სომხეთის პრემიერ-მინისტრი, ნიკოლ ფაშინიანი BRICS-ის სამიტში მონაწილეობის მისაღებად ყაზანში ჩავიდა.

ფაშინიანს აეროპორტში თათრეთის რესპუბლიკის ხელმძღვანელი რუსტამ მინიხანოვი დახვდა.

რადიო თავისუფლების სომხური სამსახურის ინფორმაციით, ყაზანში გამგზავრებამდე სომხეთის პრემიერ-მინისტრმა განაცხადა, რომ სამიტზე წარადგენს პროგრამას "მშვიდობის გზაჯვარედინი". ნიკოლ ფაშინიანის თქმით, სომხეთს დაბალანსებული საგარეო პოლიტიკა აქვს და მონაწილეობს ბევრ სხვადასხვა შეხვედრაში, მათ შორის BRICS-ის სამიტში, რაც უკიდურესად რთულ თანამედროვე მსოფლიოში უფრო კარგად ორიენტირების შესაძლებლობაა.

ყაზანში იმყოფება აზერბაიჯანის პრეზიდენტი ილჰამ ალიევიც. შედგება თუ არა მისი და ფაშინიანის კონტაქტი ჯერჯერობით უცნობია.

BRICS-ის სამიტი ყაზანში 22-24 ოქტომბერს იმართება. მასში 36 ქვეყნის წარმომადგენელი მონაწილეობს.