ისრაელის საჰაერო ძალებმა ლიბანში ჰეზბოლას 160-ზე მეტ ობიექტს დაარტყეს. ინფორმაციას The Times of Israel ავრცელებს.

ისრაელის თავდაცვის ძალების ინფორმაციით, რამდენიმე დარტყმა კოორდინირებული იყო სამხრეთ ლიბანში მოქმედი სახმელეთო ძალების მიერ, რის შედეგადაც დაიღუპა ათობით ტერორისტი.

Reuters-ის ინფორმაციით, ისრაელმა სირიის დედაქალაქ დამასკოზე და ქალაქ ჰომსის მახლობლად არსებულ სამხედრო ობიექტზე საჰაერო დარტყმები დაიწყო.

სირიის ოფიციალური უწყებების ინფორმაციით, ისრაელის თავდასხმები მიზნად ისახავდა დამასკოს ცენტრალურ უბნის კაფრ სოუსას და ქალაქ ჰომსთან არსებული სამხედრო ობიექტის განადგურებას. მათივე განცხადებით, აფეთქებების შედეგად დაიღუპა ერთი ჯარისკაცი და დაიჭრა შვიდი ადამიანი.

ისრაელი აცხადებს, რომ ლიბანში ბოლო 48 საათში ლიკვიდირებულია ჰეზბოლას სამი მეთაური და 70-მდე მებრძოლი. გაცემულია ევაკუაციის ბრძანება ლიბანის სამხრეთით მდებარე საპორტო ქალაქ ტირეს რამდენიმე ცენტრალურ უბანში.

"ისრაელის თავდაცვის ძალები ლიბანის სამხრეთით აგრძელებენ შეზღუდულ და მიზანმიმართულ რეიდებს ჰეზბოლას ტერორისტული ინფრასტრუქტურისა და მებრძოლების წინააღმდეგ. ბოლო 48 საათის განმავლობაში დაახლოებით 70 ტერორისტი განეიტრალდა", — ნათქვამია ისრაელის თავდაცვის ძალების განცხადებაში.

ლიბანის მთავრობის ინფორმაციით, ისრაელის შეტევების შედეგად, სულ მცირე, 1.2 მილიონი ლიბანელი იძულებული გახდა, დაეტოვებინა საცხოვრებელი ადგილი, ხოლო 2,530 ადამიანი დაიღუპა.