ქართული ოცნების რიტორიკა პირდაპირ ამართლებს რუსულ აგრესიას საქართველოში, — ამის შესახებ ომის კვლევის ინსტიტუტი (ISW) წერს.

"ქართული ოცნების რიტორიკა ცალსახად ამართლებს რუსეთის აგრესიას საქართველოში და ასახავს რუსეთის საინფორმაციო კამპანიებს, რომლებიც ცდილობენ რუსეთის მიერ საქართველოს სუვერენიტეტისა და ტერიტორიული მთლიანობის დარღვევიდან ბრალი შიდა აქტორებზე გადაიტანონ.

ქართული ოცნების ეს რიტორიკული ხაზი პირდაპირ ასახავს კრემლის პოზიციას 2008 წელს რუსეთის შემოჭრის შესახებ საქართველოში და რუსეთის შეჭრის შესახებ უკრაინაში 2014 და 2022 წლებში და მხარს უჭერს მოსკოვის არგუმენტს, რომ პოსტსაბჭოთა სახელმწიფოების საშინაო პოლიტიკა თავისთავად საკმარისია რუსეთის შეჭრის გასამართლებლად." — ნათქვამია სტატიაში.

ომის კვლევის ინსტიტუტის განმარტებით, ქართული ოცნების საარჩევნო კამპანიაში გამოიყენეს შენობები, რომლებიც რუსმა სამხედროებმა უკრაინაში გაანადგურეს. ISW მიიჩნევს, რომ ეს რეკლამები ხაზს უსვამს ქართული ოცნების სავარაუდო ნარატივს მშვიდობის შესახებ და კრემლის რიტორიკას ემთხვევა უკრაინაში რუსეთის სრულმასშტაბიან შეჭრასთან დაკავშირებით.

გამოცემის მიხედვით, კრემლი დაინტერესებულია, რომ გამოიყენოს რუსეთის მიმართ მეგობრულად განწყობილი საქართველოს მთავრობა, რათა მოიპოვოს წვდომა დიდ ქართულ პორტებზე, როგორებიცაა ბათუმი და ანაკლიაში დაგეგმილი ღრმაწყლოვანი საზღვაო პორტი იმისათვის, რომ შავი ზღვის რეგიონში საკუთარი გავლენის სფერო გააფართოოს.

"რუსეთს, სავარაუდოდ, აქვს გრძელვადიანი ინტერესები, გააფართოოს კომერციული და სამხედრო წვდომა საქართველოში შავი ზღვის დიდ პორტებზე, რომლებსაც შეუძლიათ დიდი სამხედრო და კომერციული გემების მიღება, ოჩამჩირის პორტისგან განსხვავებით, შავი ზღვის რეგიონში გავლენის გაფართოების მიზნით [...] ქართული ოცნების წინასაარჩევნო რიტორიკამ, რომელიც ხაზს უსვამს რუსეთთან შერიგებას და მოსკოვის პასუხისმგებლობის უგულებელყოფას 2008 წლის ომზე, შეიძლება გააძლიეროს რუსული გავლენა შავი ზღვის ამ სექტორში", — ნათქვამია სტატიაში.

ომის კვლევის ინსტიტუტის დასკვნით, ქართული ოცნების საპარლამენტო გამარჯვება და რუსეთის მიმართ აშკარად მეგობრული საგარეო პოლიტიკის გატარება, დასავლეთისთვის დიდ პრობლემას შექმნის, რადგან ეს საშუალებას მისცემს რუსეთს, საკუთარი მილიტარისტული მიზნებს მიღწევას. სტატიაში ნათქვამია, რომ ქართული საზოგადოების პროდასავლური ორიენტაციის მიუხედავად, მმართველი პარტიის პოლიტიკამ და რიტორიკამ უკვე გამოიწვია დასავლური ქვეყნების მიერ საქართველოსთან დახმარებისა და თანამშრომლობის შეზღუდვა.