4 მარტს საქართველოსა და აზერბაიჯანის მხარეებს გამართულ შეხვედრაზე ახალი შეთანხმება გაფორმდა, რომლის მიხედვითაც, საქართველო გაზს აზერბაიჯანული ნავთობკომპანიისგან მიიღებს.

შეხვედრას ესწრებოდნენ საქართველოს პრემიერმინისტრი გიორგი კვირიკაშვილი, სოკარის პრეზიდენტი როვნაგ აბდულაევი და ენერგეტიკის მინისტრი კახა კალაძე.

მხარეებმა ხელი მოაწერეს ახალ ხელშეკრულებას, რომლის მიხედვითაც საქართველო სოკარისგან დამატებით 500 მილიონ მ3-ის მოცულობის გაზს მიიღებს.

კახა კალაძის თქმით, სოკარმა საქართველოსთვის სოციალური და ასევე კომერციული გაზის ფასი შეამცირა. გაზგასამართი სადგურებისთვის კომერციული გაზის ფასი 1000 მ3-ზე 35-40 ამერიკული დოლარით დაიწევს.

მხარეებმა ხელშეკრულების პაკეტს ხელი უკვე მოაწერეს.

ენერგეტიკის მინისტრის განცხადებით, საქართველოს რუსეთიდან ბუნებრივი აირის დამატებითი მოცულობის შემოტანა აღარ დასჭირდება და ქართული მხარე გაზპრომს ძველი კონტრაქტის პირობებში დარჩენას სთავაზობს. კალაძის თქმით, ასევე აღარ არსებობს ირანიდან გაზის შემოტანის საჭიროება:

"ჩვენ უკვე ჩვენს სტრატეგიულ პარტნიორ ქვეყანასთან (აზერბაიჯანი) და კომპანიასთან (სოკარი) გვაქვს გაფორმებული ხელშეკრულება, რომელიც უზრუნველყოფს საქართველოში ბუნებრივი აირის მოწოდებას და ბაზრის დაკმაყოფილებას".

ენერგეტიკის მინისტრი კახა კალაძე 2015 წლის ბოლოს აცხადებდა, რომ ქართულ ბაზარზე ბუნებრივი აირის დეფიციტი იქმნებოდა, რაც გაზპრომიდან გაზის შემოტანას აუცილებელს ხდიდა. საქართველოში რუსული გაზმომმარაგებელი კომპანიის შესაძლო გამოჩენას საზოგადოების ნაწილის უკმაყოფილება მოჰყვა.