ლეგენდარული გერმანული დუოს დამფუძნებელი, Ali Schwarz, პროექტის შექმნიდან 20 წლის თავზე ბათუმს სტუმრობს.

Tiefschwarz 20 წლის წინ ქალაქ შტუტგარტში შეიქმნა. ძმებმა, ალი და ბასტი შვარცებმა, კარიერა საკლუბო სისტემას ადრეულ 90-იან წლებში დაუკავშირეს. ალი ცნობილი ON-U-სა და Red Dog-ისთვის მუშაობდა.

ძმებმა მალევე გადაწყვიტეს საკუთარი მუსიკალური პროექტი შეექმნათ. მათი პირველი რელიზი Music-ია, რომელიც 1998 წელს ნიუ-იორკულ Wave Music-ზე გამოვიდა. სადებიუტო ალბომი "Ral-9005" კი იმდენად წარმატებული გამოუვიდათ, რომ მსოფლიოს გარშემო არაერთი ტური დაგეგმეს.

2000 წელს ლონდონურმა ლეიბლმა Classic მათი რემიქსების კრებული “A Little Help For Your Friends” გამოუშვა.

Tiefschwarz

ფოტო: Resident Advisor

2000-იანებიდან მოყოლებული პროექტი ისეთი არტისტების ნამუშევრების რემიქსებს ქმნის, როგორებიც არიან Ultra Naté, Freaks, Isolee, The Rapture, Cassius, Minimal Compact, DJ Hell, Missy Elliot and Kelis, Madonna, Depeche Mode.

2006 წელს ალიმ და ბასტიმ გერმანიაში დაბრუნება გადაწყვიტეს და შექმნეს ლეიბლი Souvenir. 2007 წელს მათი საუკეთესო ნამუშევრების კრებული გამოვიდა. 2008 წელს კი დუეტს პროდიუსერი Philipp Meier იგივე Santé შეუერთდა.

2010 წელს Tiefschwarz-მა დისკი "Chocolate" ჩაწერა, რომელიც მათ შემოქმედებაში წინ გადადგმული დიდი ნაბიჯია - ჟანრობრივი მრავალფეროვნებით, თუ ძველი და ახალი სტილის იდეალური შერწყმით. დისკს მალევე ციფრული გაგრძელება მოჰყვა, სახელად "More Chocolate", უკვე მოგვიანებით კი რემიქს ალბომი "Melted Chocolate".

Tiefschwarz-თან ერთად 16 აგვისტოს ქართულ პროექტს - Autumn Tree-ს მოისმენთ. დუო Greenbeam&Leon-ის საიდ პროექტია. Autumn Tree-ს შექმნის იდეა მას მერე გაჩნდა, რაც მუსიკოსებმა ტრადიციული ტექნო ჟღერადობისგან სრულიად განსხვავებული მუსიკის წერა დაიწყეს.

პროექტი მელანქოლიურ, მინორულ მუსიკას ქმნის. მათი სეტები კი ღრმა, ეიფორიული და მელოდიური საუნდით გამოირჩევა.

ივენთი 23:00 საათზე დაიწყება. ბილეთების შეძენა შეგიძლიათ ონლაინ Eventer-ზე ან კარზე.