უკრაინის თავდაცვის სამინისტროს დაზვერვის მთავარი სამმართველოს ხელმძღვანელი კირილო ბუდანოვი ამბობს, რომ უკრაინაში ომში მონაწილეობის მისაღებად რუსეთის აღმოსავლეთში მომზადებას, დაახლოებით, 11 ათასი ჩრდილოეთკორეელი ქვეითი გადის.

"ისინი 1 ნოემბრისთვის იქნებიან მზად", — განაცხადა ბუდანოვმა The War Zone-თან ინტერვიუში.

ამასთან, რუსეთი უარყოფს ჩრდილოეთ კორეის რაიმე სახით უკრაინის წინააღმდეგ ომში მონაწილეობას.

უკრაინის პრეზიდენტმა, ვოლოდიმირ ზელენსკიმ, გუშინ, ბრიუსელში განაცხადა, რომ უკრაინის წინააღმდეგ შეიძლება 10 ათასი ჩრდილოკორეელი ჯარისკაცი ამოქმედდეს.

ზელენსკი: ჩრდილოეთ კორეის არმიის ოფიცრები უკვე უკრაინის ოკუპირებულ ტერიტორიებზე იმყოფებიან

პარასკევს, სამხრეთ კორეამ განაცხადა, რომ ჩრდილოეთ კორეის ჯარების რუსეთში გაგზავნა, საერთაშორისო უსაფრთხოებისთვის სერიოზულ მუქარას წარმოადგენს და რომ სეული ყოველი ხელმისაწვდომი საშუალებით მოახდენს რეაგირებას.