"თითქმის 500-მა [პარლამენტარმა] მისცა ხმა [რეზოლუციას]. ეს დიდი რამაა, გზავნილია და შეუძლებელია, რომ ასეთი რამ იყიდო", — ასე გამოეხმაურა ევროპარლამენტის წევრი და ლიეტუვის ყოფილი თავდაცვის მინისტრი, რასა იუკნევიჩიენე ამერიკის ხმასთან თბილისის მერის, კახა კალაძის კომენტარს გასულ კვირას, ევროპარლამენტის მიერ მიღებულ რეზოლუციასთან დაკავშირებით, სადაც საქართველოში დემოკრატიის უკუსვლაზეა საუბარი.

"რაც შეეხება თანხის გადახდას და სხვა ბრალდებებს. ვშიშობ, ისინი [“ქართული ოცნება”] სხვებზეც ისე ფიქრობენ, როგორც თავად იქცევიან. თუ თვლიან, რომ შესაძლებელია აქ ხმების მოსყიდვა ისე, როგორც ამას ბიძინა ივანიშვილი ცდილობს - მაშინ ვეტყვი, რომ ეს არაა ევროპული ღირებულებები და ეს არ ხდება ევროკავშირის პარლამენტში. თითქმის 500-მა [პარლამენტარმა] მისცა ხმა [რეზოლუციას]. ეს დიდი რამაა, გზავნილია და შეუძლებელია, რომ ასეთი რამ იყიდო", — აცხადებს რასა იუკნევიჩიენე.

კალაძემ გამოთქვა ვარაუდი — შესაძლოა, რეზოლუციაზე მომუშავეთაგან "ვინმეს ფული გადაუხადეს".

"გულწრფელად ვამბობ, რომ რეზოლუციებს არანაირი ფასი არ აქვს, რადგან ვიცით, თუ როგორ იწერება ისინი. გავა გარკვეული დრო და გაირკვევა, რომ ვიღაცას ფული გადაუხადეს და ეს კონკრეტული რეზოლუცია იმის მიხედვით დაიწერა", — განაცხადა კალაძემ.