შინაგან საქმეთა მინისტრი გიორგი მღებრიშვილი რუსი პრენკერის გავრცელებულ აუდიო ჩანაწერს გამოეხმაურა. მღებრიშვილი რუსთავი 2-თან საუბრისას თავისი უწყების მიერ გაკეთებულ განცხადებაზე მიუთითებს და დამატებით თავის მართლებას საჭიროდ არ მიიჩნევს:

"მინდა გითხრათ, რომ დარდიც არ მაქვს. თუ საჭირო გახდა ჩაატარონ გამოძიება, ჩაატარონ ექსპერტიზები, რა სახისაც გინდათ იყოს. ერთ რამეს გეტყვით, რომ ეფ-ეს-ბე-ს აგენტები და ნაციონალური მოძრაობის წევრები ორკესტრირებულად, ერთად უტევენ ხელისუფლებას და ეს არის აგორებული შავი პიარი, რომელიც ჩვენს შესასუსტებლად არის მიმართული."

საქმე ეხება უკრაინულ მედიაში გავრცელებულ აუდიო ჩანაწერზე, სადაც, სავარაუდოდ, გიორგი მღებრიშვილი მიხეილ სააკაშვილს უცენზურო სიტყვებით მოიხსენიებს და ამბობს, რომ საქართველოში მის ექსტრადიციას არ მოითხოვენ. ჩანაწერთან დაკავშირებით გამოძიების დაწყების მოთხოვნით პროკურატურას უკვე მიმართა საქართველოს ექს-პრეზიდენტის ადვოკატმა.

შინაგან საქმეთა სამინისტრო უარყოფს, რომ აღნიშნული საუბარი ნამდვილად შედგა. უწყების პოზიციას იზიარებს საპარლამენტო უმრავლესობაც. მათი აზრით, ასეთი კავშირები ღია სატელეფონო ხაზით არ დგება და ჩანაწერის ავთენტურობაზე სეროზულად საუბარი არ შეიძლება.

რუსი პრენკერი, ლექსუსი კი რუსთავი 2-თან ინტერვიუში ამტკიცებს, რომ გიორგი მღებრიშვილს უკრაინის შს მინისტრის სახელით ნამდვილად ესაუბრა. მისი თქმით, ჩანაწერი ავთენტურია და ამის შემოწმება ექსპერტიზით შეიძლება.