ვაიმარის სამკუთხედის წევრებმა, გერმანიამ, საფრანგეთმა და პოლონეთის საგარეო საქმეთა მინისტრებმა ერთობლივი განცხადება გამოაქვეყნეს საქართველოს შესახებ.

მინისტრებმა ხაზი გაუსვეს ქართველი ხალხის გვერდში დგომას მათი აბსოლუტური უმრავლესობის დემოკრატიული და ევროპული მისწრაფებებს და მხარდაჭერა და გვერდში დგომა, კიდევ ერთხელ, გამოუცხადეს.

სამივე ქვეყნის საგარეო საქმეთა მინისტრები აღნიშნავენ იმ ფაქტს, რომ ევროკავშირისა და საქართველოს მთავრობა საფრთხის ქვეშ დგას. ქვეყნები საქართველოს მთავრობას მიმდინარე კურსის ცვლილებებისკენ მოუწოდებენ.

"ჩვენ ვწუხვართ საქართველოს მთავრობის იმ ქმედებების გამო, რომლებმაც, როგორც 27 წევრი სახელმწიფოსა თუ მთავრობის მეთაურების წარმომადგენელმა ევროსაბჭომ 27 ივნისს გამოაცხადა, საქართველოს ევროკავშირში გაწევრიანების პროცესი დე ფაქტოდ შეაჩერა.

ნეგატიური ტენდენცია მას შემდეგ მხოლოდ გაუარესდა რეპრესიების შემაშფოთებელი მუქარით, ე. წ. "გამჭვირვალობის კანონის" ძალაში შესვლით, რომელიც სტიგმას ადებს იმ არასამთავრობო ორგანიზაციებს, რომლებიც დაფინანსების 20%-ზე მეტს უცხოეთიდან იღებენ და მათ უცხო ძალების ინტერესების გამტარ ორგანიზაციებს არქმევს, ახლახან მიღებული საკანონმდებლო ცვლილებებით, რომლებიც ზღუდავს LGBT+ ადამიანების უფლებებს, ასევე თავდასხმებით სამოქალაქო საზოგადოების ორგანიზაციებსა და დამოუკიდებელ ჟურნალისტებზე.

ამასთან ერთად, ჩვენ სულ უფრო დიდი შეშფოთებით ვამჩნევთ ევროკავშირისა და მისი წევრი ქვეყნების მიმართ აგრესიული რიტორიკის გაძლიერებას. ევროკავშირი არ მოითმენს საქართველოს ხელისუფლების წარმომადგენლების მხრიდან ევროპული პოზიციებისა და პოლიტიკის შესახებ ცრუ ნარატივების გავრცელებას

ჩვენ მოველით საქართველოს ხელისუფლებისგან, რომ უზრუნველყოფს მოახლოებული არჩევნების სამართლიან და თავისუფალ ჩატარებას და ეუთო/ODIHR-ის რეკომენდაციების დაცვას, განსაკუთრებით, რაც შეეხება საარჩევნო კამპანიის თავისუფლად და უსაფრთხოდ წარმართვის შესაძლებლობას", — ვკითხულობთ განცხადებაში.

განცხადებაში ასევე წერია, რომ ვაიმარის ქვეყნების წარმომადგენლებს იმედი აქვთ და სჯერათ, რომ საქართველო პრიორიტეტული რეფორმების განხორციელების ვალდებულებას თავისთავზე კვლავ აიღებს.

"ჩვენ მზად ვართ გავაგრძელოთ ევროპული მომავლისკენ მიმავალ გზაზე ქართული საზოგადოების მხარდაჭერა. ჩვენ ვაგრძელებთ საქართველოს სუვერენიტეტისა და ტერიტორიული მთლიანობის განმტკიცებასა და მხარდაჭერას მის საერთაშორისოდ აღიარებულ საზღვრებში" ,— წერია პოლონეთის, გერმანიისა და საფრანგეთის საგარეო საქმეთა მინისტრების საერთო განცხადებაში.