ქართული ოცნების წინასაარჩევნო კლიპის გადაღების გამო, კომპანია JWT METRO-ს თანამშრომლები ტოვებენ. როგორც კომპანიის დირექტორი, ნიკა ბოჭორიშვილი აცხადებს, კლიპი ფრილანსერების გუნდთან ერთად გადაიღეს.

"ეს რგოლი გადაღებულია ჩემი ხელმძღვანელობით მოწვეულ ფრილანსერ გუნდთან ერთად", — წერს ბოჭორიშვილი.

მას შემდეგ, რაც სოციალურ ქსელში ბოჭორიშვილის პოსტი გამოჩნდა, რამდენიმე თანამშრომელმა სამსახურის დატოვების შესახებ გააკეთა განცხადება. მათ შორისაა სანდრო ჯავახიშვილი.

"სამწუხაროა, რომ კომპანიაში სადაც 4 წელი გავატარე კეთდება პროექტი, რომლის შესახებაც არაფერი ვიცოდით. რომ გვცოდნოდა, ამ გადაწყვეტილებას უფრო მარტივად და სწრაფად მივიღებდი. შემიძლია დარწმუნებით ვთქვა, რომ სააგენტოს თანამშრომლები ამ პროექტში არ მონაწილეობდნენ, თუმცა ეს კომპანიაზე კარგს მაინც არაფერ ამბობს.

P.S. ვეძებ სამსახურს" — წერს ის.

კომპანია JWT METRO გიკა მიქაბერიძემაც დატოვა. შესაბამისი პოსტი მან Facebook-ზე გამოაქვეყნა.

ამის პარალელურად, JWT METRO-მ ოფიციალურ ფეისბუქ გვერდზე დაპოსტა:

JWT METRO left job at JWT METRO. პოსტი გამოქვეყნებიდან რამდენიმე წუთში კი პოსტი წაიშალა.

საუბარია კლიპზე, რომელიც ქართულმა ოცნებამ გუშინ გაავრცელა. აღსანიშნავია ის ფაქტი, რომ ქართული ოცნების გვერდზე საარჩევნო ვიდეოს აღწერაში კლიპის ავტორი მითითებული არ არის.

ცნობისათვის, 2024 წლის მაისში შემოქმედებითი ინდუსტრიის წარმომადგენლებმა რუსული კანონის წინააღმდეგ განცხადება გაავრცელეს და ბიზნესმენებს, რომლებიც სადაო კანონს მხარი დაუჭირეს, ბოიკოტი გამოუცხადეს. ამ განცხადებას JWT METRO-ც უერთდებოდა.