ბილი აილიშისთვის ალბათ სულ არაა უცნაური ის ამბავი, როცა კონცერტზე მის სიმღერას ათიათასობით ადამიანი ჰყვება. თუმცა, აყოლაცაა და აყოლაც — როცა სენტიმენტალურ მელოდიაზე გარშემო ყურთასმენისწამღები კნავილი იწყება, ძნელია, სიცილი (ან ტირილი) შეიკავო.

ტიკტოკს თუ აქტიურად ადევნებ თვალს, ბოლო პერიოდში უთუოდ შეგხვდებოდა აილიშის კონცერტებზე გადაღებული ვიდეოები, სადაც ისმის, როგორ მღერიან ფანები პოპვარსკვლავის ოსკაროსან ჰიტს What Was I Made For? კატის ხმით. საქმე ისაა, რომ სიმღერა, რომელიც გრეტა გერვიგის ბარბის საუნდტრეკია, ინტერნეტში კატის "ქავერ ვერსიად" აქციეს. უსასრულო მიაუებად ქცეული სიმღერა, რომელსაც ტრენდის შესაბამისად სევდიანი ფისოების ნახატებსაც ურთავენ, სოციალურ ქსელს ვირუსულად მოედო და პოპულარულ "საუნდად" იქცა — მისი გამოყენებით შექმნილი ვიდეოების რაოდენობა ტიკტოკზე უკვე მილიონს აჭარბებს!

ჰოდა, რა გასაკვირია, რომ ამ ტრენდულმა კნავილმა ტიკტოკიდან რეალობაში გადაინაცვლა და ბილი აილიშის კონცერტებზე გაისმა. ამის ამსახველ ერთ-ერთ ვიდეოს პლატფორმაზე 36 მილიონზე მეტი ნახვა აქვს.

@ffranko7 #billieeilish #whatwasimadefor #miaumiau🐈 #meowmeowmeow #billieeilishedits #concert #hitmehardandsofttour #fyp #parati #viral @BILLIE EILISH ♬ sonido original - ffranko7

ეს ყველაფერი კი ბევრისთვის სახალისო ჩანს, მაგრამ ინტერნეტმომხმარებლების ნაწილმა კონცერტზე დამსწრეები გააკრიტიკა; ზოგიერთმა ეს შემსრულებლისადმი უპატივცემულობის გამოხატვად მიიჩნია, ზოგიც, როგორც ჯენზი იტყოდა, "დაიქრინჯა".

"ამის ტიკტოკზე ყურება კია სახალისო, მაგრამ კონცერტის ბილეთში რომ $200-ზე მეტი გადამეხადა და კნავილისთვის მესმინა, ძალიან გავბრაზდებოდი", — წერს ერთ-ერთი ტიკტოკმომხმარებელი კომენტარებში.

ფანების ნაწილი ამ ამბავმა ალბათ იმიტომაც გააღიზიანა, რომ What Was I Made For? სევდიანი, ღრმა მნიშვნელობის მქონე სიმღერაა. ერთი მხრივ, ის თავად ბილის ცხოვრებისეულ გამოცდილებაზე გვიყვება: თავდაჯერებულობის ნაკლებობაზე, მიზნის ძიებასა და "დაკარგულობის" განცდაზე, მეორე მხრივ კი, ფილმის შინაარსს ეხმაურება და რეალურ სამყაროში მოხვედრილი ბარბის განცდებს გადმოსცემს.

2023 წლის ზაფხულში გამოსულმა ამ სიმღერამ კომერციულ წარმატებასთან ერთად კრიტიკოსების დადებითი შეფასებაც დაიმსახურა. კომპოზიცია რამდენიმე ქვეყნის ჩარტების სათავეში აღმოჩნდა და გახდა გრემის ხუთგზის ნომინანტი, მოიგო ოქროს გლობუსი და ოსკარი.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...