რეგიონული განვითარებისა და ინფრასტრუქტურის სამინისტრო ავრცელებს ინფორმაციას, რომ დღეს, 17:00 საათზე, თბილისი-საგარეჯო 35 კმ-იანი მაგისტრალური გზა გაიხსნება.

ღონისძიებას დაესწრებიან საქართველოს რეგიონული განვითარებისა და ინფრასტრუქტურის მინისტრი ირაკლი ქარსელაძე და საავტომობილო გზების დეპარტამენსტის ადგილობრივი წარმომადგენლები.


გზის მშენებლობა დაყოფილი იყო 3 მონაკვეთად, სადაც 4-ზოლიანი ცემენტ-ბეტონის ჩქაროსნული საავტომობილო გზა აშენდა. 4 კმ-იანი ვაზიანის შემოვლითი გზა, ანუ გზის პირველი მონაკვეთი, გასულ წელს გაიხსნა.

მაგისტრალის მშენებლობა სახელმწიფო ბიუჯეტიდან დაფინანსდა და პროექტის ჯამურმა ღირებულებამ 527 მილიონ ლარს გადააჭარბა.

ინფორმაციისთვის, თბილისი-საგარეჯოს ჩქაროსნულ გზაზე, საერთაშორისო საგზაო უსაფრთხოების ნორმების დაცვით, დადგენილი იქნება მოძრაობის სიჩქარე — 110 კმ საათში.

მაგისტრალზე დაწესდება დაწესდება მინიმალური სიჩქარეც 60 კმ/სთ, ეს კი ნიშნავს, რომ ამაზე ნაკლები სიჩქარით მოძრაობა კახეთის ჩქაროსნულ გზაზე შეიზღუდება.

ცნობისთვის, თბილისი-საგარეჯოს მონაკვეთი, თბილისის კახეთთან და აზერბაიჯანის ჩრდილო-დასავლეთ რეგიონთან დამაკავშირებელი მნიშვნელოვანი სატრანსპორტო დერეფნის ნაწილია.