"ამომრჩეველს 8 ოქტომბრის ჩათვლით აქვს შესაძლებლობა, საარჩევნო სიებში უზუსტობის აღმოჩენის შემთხვევაში, მიმართოს საარჩევნო ადმინისტრაციას, სერვისების სააგენტოს და ყველა უფლებამოსილ უწყებას, რომელთა დაკავშირებითაც იქნება რამე ჩარევის საჭიროება", – ამის შესახებ ცესკო-ს თავმჯდომარემ, გიორგი კალანდარიშვილმა საქართველოს პირველი არხის გადაცემაში "ყველა შეკითხვა ცესკო-ს" განაცხადა.

მისი თქმით, ამომრჩეველი რეგისტრაციის მისამართიდან თუ არის მოხსნილი, ან სააგენტოს მიერ მისი რეგისტრაციის მისამართი იქნა ძალადაკარგულად გამოცხადებული, ან ამომრჩეველი არის უმისამართო და სურს, რომ ფაქტობრივი საცხოვრებელი ადგილის მიხედვით მოხვდეს ამომრჩეველთა ერთიან სიაში, განაცხადი 5 ოქტომბრის ჩათვლით უნდა გააკეთოს.

"მათ შორის, არის კიდევ ერთი ვადა 5 ოქტომბერი. ამომრჩეველი რეგისტრაციის მისამართიდან თუ არის მოხსნილი, ან სააგენტოს მიერ მისი რეგისტრაციის მისამართი იქნა ძალადაკარგულად გამოცხადებული, ან ამომრჩეველი არის უმისამართო, თუ ამომრჩეველს სურს, რომ ფაქტობრივი საცხოვრებელი ადგილის მიხედვით მოხვდეს ამომრჩეველთა ერთიან სიაში, შესაბამისი განაცხადი უნდა გააკეთოს 5 ოქტომბრის ჩათვლით. სხვა შემთხვევაში, საარჩევნო მისამართად ავტომატურად მიეთითება მისი ბოლო მისამართი, რომელიც სააგენტოს მონაცემთა ბაზაში იყო დაფიქსირებული მასთან მიმართებით", – განაცხადა კალანდარიშვილმა.