37 წლის ტრანსგენდერი ქალის, კესარია აბრამიძის განსაკუთრებული სისასტიკითა და გენდერის ნიშნით განზრახ მკვლელობაში ბრალდებულ 26 წლის ბექა ჯაიანს ფსიქიატრიულ-ფსიქოლოგიური ექსპერტიზა დაენიშნა.

თბილისის საქალაქო სასამართლო ბრალდებულის სამხარაულის სასამართლო ექსპერტიზის ეროვნულ ბიუროში მოთავსების შესახებ დღეს იმსჯელებს.

აღნიშნული ექსპერტიზით უნდა დადგინდეს მკვლელობის ჩადენის მომენტში ბრალდებული იმყოფებოდა თუ არა შერაცხად მდგომარეობაში.

შეგახსენებთ რომ, 37 წლის ტრანსგენდერი ქალის, კესარია აბრამიძე მეგობარმა მამაკაცმა, ბექა ჯაიანმა 18 სექტემბერს, თბილისში, დიღმის მასივში, საკუთარ ბინაში მოკლა. ის ქუთაისის აეროპორტის მიმდებარე ტერიტორიაზე დააკავეს.

გამოძიება სისხლის სამართლის კოდექსის 109-ე მუხლის "თ" და "მ" პუნქტებით მიმდინარეობს, რაც გენდერის ნიშნით განსაკუთრებული სისასტიკით დამამძიმებელ გარემოებაში ჩადენილი განზრახ მკვლელობას გულისხმობს.