2019 წლის ფილმის, Joker-ის, სექუელი — Joker: Folie à Deux ქართულ კინოთეატრებში ხვალიდან გამოჩნდება. იქამდე კი, მისი პრემიერა ვენის კინო-ფესტივალზე შედგა და ფილმმა არაერთგვაროვანი შეფასება მიიღო. უმეტესად, კრიტიკოსების აზრით, Folie à Deux წინა ნაწილის მსგავს წარმატებას ვერ გაიმეორებს, რადგან მეორე ნაწილი "მიუზიკლი უფროა ვიდრე ფანტასტიკის ჟანრის ფილმი".

ფილმში მთავარ როლს ხოაკინ ფენიქსთან ერთად ცნობილი მომღერალი, კომპოზიტორი და მსახიობი, ლედი გაგა ასრულებს. მისი პერსონაჟი ლიი ქვინზელი, იგივე ჰარლი ქვინია.

ფილმის მოკლე აღწერაში ვიგებთ, რომ არტურ ფლეკსს(ჯოკერს) ჩადენილი დანაშაულების გამო ასამართლებენ. ამ დროს ის არხამის ფსიქიატრიულშია გამოკეტილი და პიროვნების გაორებას ებრძვის. არხამში ის ლიი ქვინზელს გაიცნობს და მუსიკისადმი განსაკუთრებულ ლტოლვას იგრძნობს.

ამ მომენტისთვის IMDB-ზე ფილმის შეფასება 6.0-ია. ინტერნეტში წერენ, რომ ფილმის გადაღების ხარისხი და მსახიობების თამაში ფენომენალურია, მაგრამ ყველაფერს დიდი რაოდენობით მუსიკა და ცუდი სცენარი აფუჭებს. ჩვენ კი ისღა დაგვრჩენია ფილმის გამოსვლას დაველოდოთ და ვიმედოვნოთ, რომ ფანტასტიკის ჟანრის ბლოკბასტერის ნაცვლად, კინოთეატრებში სასიყვარულო მიუზიკლის სანახავად არ წავალთ.