ამერიკაში იუთუბიდან ადელის, გრინ დეის, ბობ დილანის, ნირვანასა და R.E.M-ის მუსიკალური ვიდეოები ამოიღეს. მაგალითად, ადელის Hello- ს ჩართვას თუ ცდი, იუთუბი გაფრთხილებას ამოგიგდებს, რომ "ვიდეო შეიცავს SESAC-ის კონტენტს და არ არის ხელმისაწვდომი შენს ქვეყანაში".

ფოტო: variety

SESAC მუსიკოსებისა და კომპოზიტორების უფლებების მართვის ორგანიზაციაა. ისინი ზემოთ ნახსენები ავტორების გარდა, სხვა ცნობილი ადამიანების საავტორო უფლებებსაც იცავენ. მათ შორისაა, ბურნა ბოისი, ჯორჯ კლინტონი, კენი როჯერსი, კონგს ოფ ლეონსი და ბევრი სხვა.

ფოტო: ultimateclassicrock

იუთუბმა ოფიციალური განცხადება გააკეთა და მომხდარი შემდეგნაირად ახსნა:

"მიუხედავად ჩვენი ძალისხმევისა, ვერ შევძელით შეთანხმება. საავტორო უფლებების დაცვა ჩვენთვის ძალიან მნიშვნელოვანია, ამიტომ SESAC-ის მიერ წარმოდგენილი კონტენტი აღარ არის ხელმისაწვდომი ამერიკულ YouTube-ზე. აქტიურად ვსაუბრობთ SESAC-თან და ვიმედოვნებთ, რომ რაც შეიძლება მალე მივაღწევთ ახალ შეთანხმებას."

ფოტო: reddit

როგორც მათ განმარტეს, SESAC-თან საავტორო უფლებების დაცვის საკითხზე ვერ შეთანხმდნენ. ამ დროისთვის შეზღუდვა ამ არტისტების ყველა კლიპს არ ეხება. ზოგიერთი მუსიკალური ვიდეო ჯერჯერობით დაბლოკილი არ არის. ამის მიზეზი კი, სავარაუდოდ, ისაა, რომ მოლაპარაკებები ამ საკითხთან დაკავშირებით ჯერ კიდევ გრძელდება.