საქართველოში უკრაინის საქმეთა დროებითმა რწმუნებულმა ტატიანა კოლოტილოვამ და უკრაინის საელჩოს სამხედრო ატაშეს წარმომადგენლებმა აფხაზეთში დაღუპული გმირების ხსოვნას პატივი მიაგეს და გმირთა მემორიალთან გვირგვინი მიიტანეს.

ამის შესახებ ინფორმაციას საელჩო ოფიციალურ გვერდზე განცხადებას ავრცელებს:

"27 სექტემბერს (სოხუმის დაცემის დღეს) საქართველოში უკრაინის საქმეთა დროებითმა რწმუნებულმა ტატიანა კოლოტილოვამ და უკრაინის საელჩოს სამხედრო ატაშეს წარმომადგენლებმა მონაწილეობა მიიღეს 1992-1993 წლებში საქართველოს სუვერენიტეტისა და ტერიტორიული მთლიანობისთვის დაღუპული ქართველი გმირების ხსოვნისადმი მიძღვნილ მემორიალურ ღონისძიებებში. მოძმე ქართველ ხალხთან ერთად საქართველოს დამოუკიდებლობისთვის უკრაინელებმაც იბრძოლეს. მემორიალის მარმარილოს ფილებზე ამოტვიფრულია იმ უკრაინელების სახელები, რომლებიც სამუდამოდ დარჩნენ ქართულ მიწაზე და ყველაზე ძვირფასი — საკუთარი სიცოცხლე შესწირეს მის დამოუკიდებლობას, სუვერენიტეტსა და ტერიტორიულ მთლიანობას.

გმირები არ კვდებიან, სანამ მათი ხსოვნა ცოცხალია.

უკრაინას ახსოვს!", — ნათქვამია გავრცელებულ განცხადებაში.