უკრაინის აღდგენისა და რეკონსტრუქციის მხარდაჭერის ერთობლივ დეკლარაციას, რომელსაც ხელს 30-ზე მეტი ქვეყანა აწერს, საქართველო არ მიუერთდა.

ინფორმაციას ერთობლივი დეკლარაციის შესახებ თეთრი სახლი ავრცელებს და ამ მოვლენას ისტორიულს უწოდებს.

დეკლარაციას შემდეგი ქვეყნებია უერთდებიან: ალბანეთი, ბულგარეთი, კანადა, ხორვატია, ჩეხეთი, დანია, ესტონეთი, ფინეთი, საფრანგეთი, გერმანია, საბერძნეთი, ისლანდია, იტალია, იაპონია, კოსოვო, ლატვია, ლიეტუვა, ლუქსემბურგი, ნიდერლანდები, ჩრდილოეთ მაკედონია, ნორვეგია, პოლონეთი, პორტუგალია, ირლანდიის რესპუბლიკა, რუმინეთი, სლოვენია, ესპანეთი, შვედეთი, უკრაინა, გაერთიანებული სამეფო და ამერიკის შეერთებული შტატები.

დეკლარაციის მთავარი პუნქტები ითვალისწინებს უკრაინის დახმარებას ევროკავშირში გაწევრიანების გზაზე. ამას გარდა — წლის ბოლომდე, გაყინული რუსული აქტივებიდან მიღებული შემოსავლით, დაახლოებით 50 მილიარდი დოლარის ფინანსურ მხარდაჭერას და უკრაინის ეკონომიკურ აღდგენას დონორთა მეშვეობით.

"საერთაშორისო სამართლის მიხედვით, ნათელია რუსეთის პასუხისმგებლობა, რომ მან უნდა გადაიხადოს მიყენებული ზიანი. ჩვენ კიდევ ერთხელ ვადასტურებთ, რომ ყველა მოქმედი კანონმდებლობისა და ჩვენი შესაბამისი სამართლებრივი სისტემების შესაბამისად, რუსეთის სუვერენული აქტივები ჩვენს იურისდიქციებში დარჩება გაყინული მანამ, სანამ რუსეთი არ დაასრულებს თავის აგრესიას და არ აუნაზღაურებს უკრაინას მიყენებულ ზარალს.

მეორე, ჩვენ ვიღებ ვალდებულებას, გამოვიყენოთ ჩვენი ეკონომიკური დახმარება, რათა უკრაინამ შეინარჩუნოს მაკროფინანსური სტაბილურობა, შეაკეთოს და ააშენოს კრიტიკული ინფრასტრუქტურა, მათ შორის ენერგეტიკის სექტორში, გაზარდოს ეკონომიკა, სოციალური მდგრადობა და გაატაროს პრიორიტეტული რეფორმები, —– ნათქვამია დეკლარაციაში.

აშშ-ს პრეზიდენტმა, ჯო ბაიდენმა განაცხადა, რომ მას გადაწყვეტილი აქვს უკრაინას ჰქონდეს ის, რაც ამ ომში გამარჯვებისთვის სჭირდება.

"მე მტკიცედ მაქვს გადაწყვეტილი უზრუნველვყო, უკრაინას ჰქონდეს ის, რაც მას სჭირდება გამარჯვებისთვის და გადარჩენისთვის საბრძოლველად. ხვალ მე გამოვაცხადებ რიგ ქმედებებს უკრაინის სამხედროების მხარდაჭერის დასაჩქარებლად", – განაცხადა აშშ-ს პრეზიდენტმა, ჯო ბაიდენმა შეხვედრის შემდეგ.