ხუთშაბათს რესპუბლიკელების საპრეზიდენტო კანდიდატმა დონალდ ტრამპმა განაცხადა, რომ ის უკრაინის პრეზიდენტ, ვოლოდიმირ ზელენსკის პარასკევს, ნიუ იორკში შეხვდება.

"პრეზიდენტმა ზელენსკიმ შეხვედრა მთხოვა და მე მას ხვალ 9:45 საათზე [თბილისის დროით 17:45], Trump Tower-ში შევხვდები", — განაცხადა ტრამპმა.

შეხვედრა იმის შემდეგ დაიგეგმა, რაც უკრაინის პრეზიდენტმა The New Yorker-ს განუცხადა, რომ ტრამპმა "არ იცის როგორ შეაჩეროს ომი, თუნდაც ეგონოს რომ იცის".

"ამ ომებში, ხშირ შემთხვევებში, როდესაც უღრმავდები [მიმდინარე სიტუაციას], მით უფრო ნაკლებად იგებ [მიმდინარე სიტუაციის კურსს]", — თქვა ზელენსკიმ.

ხუთშაბათს, ტრამპმა Trump Tower-ში გამართულ პრესკონფერენციაზე განაცხადა, რომ ის ელოდება დათქმულ შეხვედრას, მაგრამ არ ეთანხმება ზელენსკის ნათქვამს და სჯერა, რომ "მალევე შესაძლებელს გახდის პრეზიდენტ პუტინთან და პრეზიდენტ ზელენსკისთან შეთანხმების მიღწევას”.

რესპუბლიკელების საპრეზიდენტო კანდიდატს დეტალები არ გაუზიარებია მის გეგმასთან დაკავშირებით, თუ როგორ აპირებს უკრაინასა და რუსეთს შორის შეთანხმების მიღწევას, თუმცა სჯერა, რომ უკრაინის მხრიდან რუსეთისთვის ტერიტორიების დათმობა დაასრულებს ომს და მისი სტრატეგია არა კაპიტულაცია, არამედ სიცოცხლის გადარჩენაა.

შეგახსენებთ, რომ ტრამპმა უკრაინის პრეზიდენტი მის წინააღმდეგ "ბინძურ თავდასხმებში" დაადანაშაულა. მისი თქმით, ზელენსკის მხრიდან შეთანხმებაზე უარის თქმის მიუხედავად, ჯო ბაიდენმა და კამალა ჰარისმა მას მილიარდობით დოლარი მისცეს.