ფინანსთა სამინისტროს შემოსავლების სამსახურის საგადასახადო მონიტორინგის დეპარტამენტმა ბოლო 7 თვის მონაცემებით, ეროვნული ვალუტის გამოყენების წესების დარღვევის 31 ფაქტი გამოვლინდა.

შემოსავლების სამსახურის თქმით, "საქართველოს ეროვნული ბანკის შესახებ" საქართველოს ორგანული კანონის 34-ე მუხლის თანახმად, მეწარმის მიერ საქართველოს ტერიტორიაზე ქონების რეალიზაციის/მომსახურების გაწევის შეთავაზებისას ან რეკლამირებისას ფასი მხოლოდ ლარით უნდა იყოს გამოხატული.

მონიტორინგის მიერ აღმოჩენილია ბოლო 7 თვის განმავლობაში საქართველოს ტერიტორიაზე მიმოქცევაში არსებული ეროვნული ვალუტის გამოყენების წესების დარღვევის 31 ფაქტი (ვალუტა — აშშ დოლარი, რუბლი, ევრო).

დარღვევიდან გამომდინარე, 18 მეწარმე სუბიექტს ადმინისტრაციულ სამართალდარღვევათა კოდექსის 153-უხლის შესაბამისად, გაფრთხილება შეეფარდა. 13 პირი ამავე კოდექსის 153-ე მუხლის პირველი და 153-ე მუხლის მეშვიდე პუნქტებით, 8200 ლარით დაჯარიმდა.

"ფინანსთა სამინისტროს შემოსავლების სამსახური კიდევ ერთხელ შეახსენებს მეწარმე სუბიექტებს, რომ „საქართველოს ეროვნული ბანკის შესახებ“ საქართველოს ორგანული კანონის თანახმად, საქართველოს ტერიტორიაზე, ლარი არის გადახდის ერთადერთი კანონიერი საშუალება, გარდა თავისუფალი ინდუსტრიული ზონებისა, თავისუფალი ვაჭრობის პუნქტებისა ან/და ეროვნული ბანკის მიერ განსაზღვრული შემთხვევებისა, შესაბამისად, მოუწოდებს თავი შეიკავონ ეროვნული ვალუტის გამოყენების წესების დარღვევისგან", — წერია შემოსავლების სამსახურის განცხადებაში.