უკრაინის პრეზიდენტი ვოლოდიმირ ზელენსკი შეერთებულ შტატებში ჩავიდა, სადაც "გამარჯვების გეგმას" ქვეყნის პრეზიდენტს ჯო ბაიდენს და პარტნიორი ქვეყნების ლიდერებს წარუდგენს.

"ვიწყებთ ვიზიტს შეერთებულ შტატებში, ახლა მივდივართ პენსილვანიაში, შემდეგ ნიუ-იორკში და ვაშინგტონში.

სწორედ ამ შემოდგომაზე გადაწყდება, რა მოხდება ამ ომში. ჩვენს პარტნიორებთან ერთად შეგვიძლია გავაძლიეროთ ჩვენი პოზიციები გამარჯვებისთვის, საერთო გამარჯვებისთვის, ჭეშმარიტად სამართლიანი სამყაროსთვის.

უკრაინა ამერიკის შეერთებულ შტატებს გამარჯვების გეგმას წარუდგენს. პირველი, ვინც ამ გეგმას ნახავს, ამერიკის პრეზიდენტი იქნება. მე წარვუდგენ გამარჯვების გეგმას ჩვენი პარტნიორი ქვეყნების ყველა ლიდერს, რომლებიც, პრეზიდენტი ბაიდენის მსგავსად, მსოფლიოს ლიდერები არიან", — განაცხადა ზელენსკიმ ყოველდღიურ მიმართვაში.

პრეზიდენტმა ასევე დააანონსა შეხვედრები უახლოეს დღეებში გლობალური სამხრეთის, G7-ის, ევროპის ქვეყნების ლიდერებთან და საერთაშორისო ორგანიზაციების ხელმძღვანელებთან.