ევროპის საბჭოს მინისტრთა კომიტეტმა შეშფოთება გამოთქვა საქმის "საქართველო რუსეთის წინააღმდეგ" I და II სახელმწიფოთაშორის დავებზე ევროპის ადამიანის უფლებათა გადაწყვეტილების აღუსრულებლობის გამო.

საქმეები ეხება 2006 წელს რუსეთიდან ქართველების მასობრივ დეპორტაციას და 2008 წლის აგვისტოს ომს. რუსეთს ერთ შემთხვევაში 10 000 000 ევროს ოდენობის კომპენსაციის გადახდა აქვს დაკისრებული, ხოლო აგვისტოს ომის საქმეზე 129 მილიონ ევროზე მეტი.

იმის გამო რომ რუსეთი არ აღასრულებს სტრასბურგის სასამართლოს გადაწყვეტილებებს, დაკისრებული კომპენსაცია იზრდება. შესაბამისად, 2024 წლის სექტემბრის მდგომარეობით, დეპორტაციის საქმეზე რუსეთის ფედერაციის მთლიანი დავალიანებამ 12 503 972,60 ევრო შეადგინა, ომის საქმეზე კი — 141 183 849,33 ევრო.

ევროპის საბჭოს მინისტრთა კომიტეტი რუსეთის ხელისუფლებას მოუწოდებს, რომ შეასრულოს საერთაშორისო სამართლისა და კონვენციით ნაკისრი ვალდებულებები, ასევე აღასრულოს სტრასბურგის სასამართლოს გადაწყვეტილებები და დაუყოვნებლივ გადაიხადოს კომპენსაციები დარიცხულ საპროცენტო განაკვეთთან ერთად!