190 დღეზე მეტია სოფელ შუქრუთის მოსახლეობა ჯეორჯიან მანგანეზის სამუშაოების შედეგად მიყენებული ზიანის ანაზღაურებას ითხოვს.

პროტესტის მონაწილეთა ნაწილმა შიმშილობა გამოაცხადა, ხუთ მათგანს კი პირი აქვს ამოკერილი.

11 სექტემბერს, პროტესტმა თბილისში, პარლამენტის შენობასთან გადმოინაცვლა — მოთხოვნა უცვლელია, თუმცა, ზარალის ანაზღაურებასთან ერთად ამჯერად, ისინი პროცესში ხელისუფლების დაუყოვნებლივ ჩართვასაც ითხოვენ.

დღეს, 19 სექტემბერს მოშიმშილეები კანცელარიის შენობაშიც მივიდნენ, სადაც პრემიერთან შეხვედრა წერილობითაც მოითხოვეს. პრემიერ-მინისტრი ირაკლი კობახიძე მიმდინარე პროტესტს ერთხელ გამოეხმაურა და თქვა, რომ "აქციის ორგანიზატორებს კომპანიისგან ასობით ათასი ლარი აქვთ აღებული".

პრემიერის ამ განცხადებას, შუქრუთელებმა NEWS.on.ge-სთან უპასუხეს;

შუქრუთის მკვიდრი, გიორგი ბიწაძე პრემიერს ადგილზე მისვლისკენ მოუწოდებს, რათა მოსახლეობის რეალური წუხილი პირადად მოისმინოს და სიტუაციაში უკეთ გაერკვეს.

ბიწაძის თქმით, კარვის გაშლა, პარლამენტის შენობასთან, პირველივე დღეს სურდათ, თუმცა ამის საშუალება მათ პოლიციამ არ მისცა. ძალოვანმა უწყებამ გადაწყვეტილება არც მაშინ შეცვალა, როცა დედაქალაქში ამინდი გაუარესდა და შუქრუთელებს წვიმაში მოუწიათ ღია ცის ქვეშ დარჩენა.

დღეს თბილისში კვლავ ნალექიანი ამინდია. პირამოკერილ შუქრუთელებს პროტესტის გამოხატვა, ღია ცის ქვეშ, წვიმაში უწევთ.

შეგახსენებთ, რომ ორი დღის წინ, საქართველოს სახალხო დამცველმა გაავრცელა განცხადება, სადაც ის ხაზგასმით აღნიშნავს, რომ სახელმწიფო ვალდებულია უზრუნველყოს აუცილებელი პირობები შეკრების თავისუფლებით სარგებლობისთვის და მათ შორის, ხანგრძლივი, "ოკუპაციური" სტილის აქციების გასამართად.

"თავის მხრივ, ამინდის გაუარესების პარალელურად კარვით სარგებლობა არა მხოლოდ უფლებით დაცულ სიმბოლურ ჟესტს, არამედ შეკრების გამართვისა თუ მისი უწყვეტი მიმდინარეობისთვის აუცილებელ წინაპირობასაც წარმოადგენს, რაც ხელისუფლების მხრიდან მასზე დაკისრებული ვალდებულების შესრულებას დამატებით მნიშვნელობას სძენს. ნიშანდობლივია ისიც, რომ შეკრების მონაწილეებს შორის არიან მოშიმშილეებიც, რომელთა ჯანმრთელობის მდგომარეობა განსაკუთრებულ ყურადღებას საჭიროებს", — ნათქვამია სახალხო დამცველი განცხადებაში.