ყაზბეგის ქუჩაზე მშენებლობა კანონიერია, - ამის შესახებ დედაქალაქის მერმა კახა კალაძემ ჟურნალისტების შეკითხვის საპასუხოდ განაცხადა, რომელიც ყაზბეგის N32ა-ში მცხოვრები მოსახლეობის პროტესტს ეხებოდა, მიმდინარე მშენებლობის წინააღმდეგ.

კახა კალაძემ განაცხადა, რომ თბილისის მერია მზადაა, მოსახლეობას ავარიული კორპუსის გამაგრებაში ან სრულად ჩანაცვლებაში დაეხმაროს.

"სრული პასუხისმგებლობით გეუბნებით, რომ მშენებლობა მიმდინარეობს კანონიერად. მე ვიცნობ აღნიშნულ პრობლემას. რაც შეეხება იმ კორპუსის ავარიულობას, არაერთხელ დავაფიქსირეთ და კიდევ ერთხელ გამოვხატავთ მზაობას, რომ დავეხმაროთ ამ ადამიანებს, ხელი შევუწყოთ კორპუსის გამაგრებაში. თუ ეს წინადადება მათთვის მიუღებელია, შეგვიძლია მეორე პროექტი განვახორციელოთ — ეს არის კორპუსის ჩანაცვლება, ძველის დემონტაჟი და ახლის მშენებლობა", — განაცხადა დედაქალაქის მერმა.

მისივე თქმით, აღნიშნულ მშენებლობასთან კავშირი არ აქვს ბიძინა ივანიშვილის ძმას. ეს პოლიტიკური სპეკულაციებია.

შეგახსენებთ, რომ ყაზბეგის 32-ა-ში მცხოვრები მოსახლეობა კორპუსის მშენებლობას აპროტესტებს. ისინი დილიდან იყვნენ შეკრებილები მშენებლობის ადგილას და სამშენებლო კომპანიის წარმომადგენლებს არ აძლევდნენ უფლებას, რომ ადგილზე მძიმე ტექნიკა შეეყვანათ.

ადგილობრივები ამბობენ, რომ აქ 5-სართულიანი კორპუსი უნდა აეშენებინათ და ახლა 11-სართულიანი კორპუსის აშენების გეგმა აქვთ, რაც დააზიანებს გვერდით მდგარ კორპუსს, რომელიც [აღნიშნული მშენებლობის გამო] 33 სმ-ით უკვე გადახრილია.

"უნდათ სისრულეში მოიყვანონ უნებართვოდ გაცემული მშენებლობის დასრულება, უნდათ ჩაასხან ბეტონი. ჩვენ არ ვაძლევთ ნებას იმიტომ, რომ ჩვენს 14-სართულიან კორპუსს გამოაცალეს ძირი და წყალი, რამაც გამოიწვია ნიადაგის გამოშრობა და გადაიხარა კორპუსი 33 სმ-ით. გვაქვს 3 დაკვირვება დინამიკაში, სამხარაულმა მოგვანიჭა დაზიანების მეორე კატეგორია და დაწერა, რომ შეწყვეტილი უნდა იქნას სამუშაოები, სანამ არ გამაგრდება კორპუსი. არ გვინდა ჩავიმარხოთ ნანგრევებში. არ გვინდა აქ განმეორდეს ბათუმის ტრაგედია. ყველა ინსტანციაზე გვაქვს განცხადება შეტანილი, მერიაში, ხაზზე გვყავს საკრებულოს თავმჯდომარე", — აცხადებს ერთ-ერთი ადგილობრივი.